陳偉霆食得開心慶生冇催婚

圈中情侶陳偉霆(William)與蔡卓妍(阿Sa)向來甜蜜,就連生日也只相差一天!當日前被拍得二人與男方家人出外用膳預祝生日的報道還未見報時,William已大方向傳媒透露帶女友見家長,訪問期間他全程露出甜蜜樣子,可見幸福滿瀉,還指「餐飯食得幾開心」,但就表示阿媽並未催婚。

前日27歲牛一的陳偉霆,於當晚出席FUJIFILM Instax Mini 8活動,同場還有官恩娜和組合Super Girls擔任嘉賓。William被問如何慶祝生日?他表示拍戲中度過:「好開心演消防員,謝霆鋒、余文樂有份拍,(驚唔驚好似黃曉明咁吊威吔跌落地?)唔驚,對香港有信心。(有咩生日願望?)希望日日有工開!」至於女友蔡卓妍(阿Sa)如何為他慶祝?他自爆帶女友見家長:「尋晚(20日)同佢、我媽咪、阿嫂食飯畀人影到,應該好快會見報!媽咪、阿嫂同我同日生日。」

壽星女30歲獲祝賀

問到家人喜不喜歡阿Sa?他九唔搭八說:「餐飯食得幾開心,(可有催婚?)梗係冇,冇呢個話題,生日飯啫。」另外,他表示有份主演的《紮職》四天過二百萬元票房,翌日會吃飯慶功。

跟William生日相差一天的阿Sa昨日30歲牛一,壽星女在微博發感言:「大家都見證着我整個成長!三十算甚麼?現在才開始呢!我還年輕!」獲圈中很多朋友及粉絲留言祝賀。

官恩娜為愛犬搬屋

而同場愛犬Barney遭劏肚的官恩娜表示愛犬情況已穩定,問會否報警?她說:「唔想搞大件事,同屋企人商量吓先,希望快啲拉到個黑心人!」她透露家中另一愛犬亦曾遇害:「佢試過畀白油淋到睇唔到嘢!(加建圍欄?)我在明佢在暗,我會盡快搬。」而Super Girls表示將推出新碟,謂當中有四個監製各有風格,故有難度,仍異口同聲說:「新挑戰,學到好多嘢!」

文:名人組