吳啟華認衰：好彩契爺原諒
吳啟華入行近三十年，與無綫關係曾經決裂，且兩離兩合，最後都獲邀返娘家演出，有感而發的他表示畢竟得無綫栽培，奈何自己少爺脾氣，對過去與公司弄致愛恨纏綿猶如情侶般又分又合，不禁自責：「呢個衰仔，成日發脾氣！好彩呢個契爺（TVB）始終原諒我，畀我返嚟！」
啱啱入行時，拍戲特別辛苦，有次我病咗發燒，真係返唔到工，監製話冇廠期一定要返，但我又死都唔肯，佢哋高層開會，拍晒枱……但都逼我唔到，點知公司就出手，將我之後一個同陳敏兒去新加坡嘅登台抽起，叫我唔使去，當時我好嬲，為呢個Show我做足準備工夫，做晒衫，又去咗錄音、排舞……最後唔畀我去！我唔想以後畀人玩死，我要解約，當年同無綫簽咗五年，我都係履行咗兩、三年左右，後來解約，出去拍電影，以奸角為主，搵到啲錢，我喺無綫走時得六千幾蚊一個月，但出面一組戲都六千蚊啦！
傳被列入黑名單
直至90年代返去拍完《妙手》後我又走，監製鄧特希搵我拍劇集《法網群英》，安排亞視播出，嗰次無綫又話我合約年期雖然過咗，但仲欠一個劇，有人話無綫出咗律師信畀我，我未見過！但的確藝員部有打嚟搵我傾份合約，話我推咗個劇《同事三分親》，當時我同佢拗，《同》係半小時處境劇，非四十五分鐘劇集嘅合約範疇，如果要拍就要再簽合約，無綫當時又冇同我簽新約，講真我都係冇違反喎……我覺得冇問題！但結果都傳我喺黑名單！
志偉勸重返娘家
今次有得返嚟，其實得志偉穿針引線，我簽咗志偉北京嘅經理人公司，可能朋友關係，志偉同我講，咁耐冇返無綫，不如返去拍個劇，咁啱無綫又係用人之際，我咪返嚟囉！如今無綫係畀唔起錢，但佢肯就我啲期，咁咪拍囉！計起上嚟，我同無綫兩離兩合，關係好似一雙愛恨纏綿嘅情侶咁，我當TVB係契爺，我就係衰仔，成日發脾氣，好彩契爺始終都原諒我！」
口述：吳啟華
文：影視組
攝：秦健輝
服裝：MA Gin