黃智賢冇提名：做好自己
去年的最佳男配角黃智賢未能憑《雷霆掃毒》的出色演出入選今年最佳男配角，網民插爆無綫之餘，黃日華、歐陽震華、麥長青等於微博留言力撐，昨日黃智賢帶着無奈心情「硬撐」記者會，揭曉今屆候選名單，他坦言收到消息時都感愕然：「呢啲嘢要問番公司，我只係做好自己。（會否有離心？）同無綫仲有合約。」而去年的最佳女配角陳敏之今年亦食白果，fans亦於微博留言說失望，敏之回覆說：「不要哭，雖然我也有點失望，但我會繼續努力的。」
同場的高層樂易玲身為評委之一，大讚黃智賢成績有目共睹及有投他一票，希望出年他可提名男主角，並指會提議明年是否加設多幾個提名名額。有指林峯台慶耍大牌沒影合照，樂易玲說：「他去咗洗手間，影完佢仲dum地問可唔可以影過。（恃住有人錫？）佢點敢呀，今次公投呀！」