婷婷激瘦８磅 安志杰藐爆
【張嘉敏澳門直擊】身材fit爆的謝婷婷昨日出席活動時，明顯比前纖瘦不少，她表示最近瘦了八磅。原來婷婷跟男友安志杰一起時冇啖好食，因男友勤於操fit，婷婷就陪男友在家中餐餐吃雞胸肉。婷婷笑言男友喜歡她肥些，可是卻沒有食物養肥她，十分矛盾。
謝婷婷與茍芸慧（茍姑娘）兩位靚女昨日齊齊以高貴形象示人，於澳門出席Longines旗艦店開幕活動。婷婷穿上透視貼身裙，而茍姑娘則以deep V吊帶裙上陣，大晒誘人事業線，性感非常。身形明顯纖瘦不少的婷婷表示近期瘦了八磅，可能因為仍未簽約新公司，很多事要親力親為，搞到自己很忙；另一原因就是和男友安志杰（Andy）一起時冇啖好食，她說：「Andy呢排keep fit keep得好緊要，佢啱啱同張家輝拍完一部格鬥嘅戲，佢大讚家輝係標準body builder，Andy喺屋企餐餐都食雞胸肉，我就陪佢一齊食。」
鍾意條腰有肥肉
問到男友喜歡她肥些還是瘦些？她說：「佢鍾意我肥啲，以前佢打機，我坐喺佢大髀度，佢搣我條腰會搣到一啲肥肉，覺得我好可愛。不過依家我冇嘢畀佢搣，佢會『藐』我。佢鍾意我肥啲，但係佢又冇嘢食餵我，好矛盾。」婷婷又透露男友與她哥哥謝霆鋒剛開始拍攝有關消防員的新戲，在香港拍攝，她可以去探哥哥班。
苟姑娘健康性感
而曾揚言要封胸的茍姑娘就表示自己不介意健康的性感，出席活動的衣着都交給公司和PR安排，她說：「始終有啲活動係要適當地表現健康嘅性感。自己想要健康啲嘅感覺，唔想人對我有錯覺。」提到台慶當晚她跳舞被指生硬，她表示因早前比較忙，自己是於台慶前一晚才全班女仔一起綵排一次，她已盡了力。而岑麗香在台上跳舞時差點失足跌倒，她說：「其實個個女仔都差啲跣腳，因為地板前面嘅部分有啲濕濕地，我都差啲跣腳，但唔可以畀人睇到。」