吳啟華：逢奸不演
吳啟華早年拍過三級片又演奸角，形象極不討好，連他本人都覺得自己個底「花到唔恨」！ 猶幸後期遇上伯樂監製鄧特希找他演正氣醫生「程至美」，啟華憑代表作《妙手仁心》贏得1998、1999和2001年無綫台慶「我最喜愛的電視角色」和「我最難忘的男主角」，成功「洗底」的他從此成為「師奶殺手」！
「真係好少機會拍到《妙手仁心》呢啲戲，喺出面拍咗唔少電影，多係奸角，後來珍姐（高層曾勵珍）搵我返無綫拍《倚天屠龍記》、《妙手》都做正氣嘅男主角，好難得，不過，獎項其實唔係咁實質，而係角色出嚟個效果令我好舒服，從此我逢奸不演。
埋沒演技
其實我遇到鄧特希，都有個過程。嗰時喺無綫做好慘，要問屋企借錢，後來出去拍電影，搵到少少錢，開始唔演奸，呢個堅持最後搞到冇戲拍。後來有導演幫有線拍套劇，講瘋人院故事，雖然個劇本好渣，但我好畀心機去做，導演同我講，以我嘅演技演呢啲劇埋沒咗我，當時套劇都冇人睇！不過，演完呢套劇後我返番無綫，嗰時都冇乜機會，咁啱一次喺樓梯碰上一位導演，叫我頂替林家棟演《900重案追兇》，做差人正氣到不得了，好！我就接。當時鄧特希睇到《900》呢個劇，覺得我可以演啲有經歷嘅角色，好啱佢當年監製嘅《壹號皇庭Ｖ》裏面一個曾經做臥底嘅差人角色『徐偉傑』，我諗……《皇庭》名劇嚟喎，梗係拍啦！拍完後個角色反應幾好，我個底之前實在太花，但亦因為『徐偉傑』洗底唔少。同鄧特希合作好開心，之後又拍《妙手》，『程至美』呢個角色觀眾好受落，我花花哋嘅底，因為咁而去蕪存菁。
改臭脾氣
『程至美』個性格咁好，直接影響我做人態度o架……一個好人應該係咁！我剛入行時候，脾氣好大，係個好失敗嘅死o靚仔、少爺脾氣，好多幕後都咁話我。點解要咁躁？因為剛入行時日拍夜拍好辛苦，每日冇時間瞓咪好躁，亂爆……尤其向住PA，依家諗番都好唔啱，大家一齊做嘢啫，又唔係人哋老闆，有乜資格鬧人？自己都NG啦，又唔見人鬧？以前唔識諗，所以『程至美』嘅出現，改變咗我，令我學咗佢裏面嘅嘢，識得照顧人哋感受。」
文：影視組
攝影：秦健輝
服裝：MA Gin