鮑起靜食兩家茶禮唔尷尬
【陳永峯深圳直擊】「亞視之光」鮑起靜、陳啟泰、朱慧珊、顏子菲等昨日出席《亞洲電視55周年星光大典》台慶拜神，既為亞視做節目，又幫王維基城電拍劇的鮑起靜說：「唔會尷尬，依家同亞視冇約，簽咗北京經理人，ATV有需要，我會幫，始終有感情，唔使合約規範。（支持發牌畀城電？）多啲工作機會梗好，ATV咁多年都冇執笠，唔使驚。（亞視用節目鬧王維基？）可能商業行徑，鬧唔死人嘅，香港社會自由表達，唔信王會被鬧倒，ATV成日被人鬧，我講咁多，唔知王征會唔會嬲添！」
陳啟泰則說：「之前應亞洲會邀請出席政總集會，以為做節目，去到唔係預期咁。（受騙？）唔係，表達唔同意見，我對發牌冇意見。」朱慧珊則說：「發牌對投資多年嘅無綫、亞視，好似有啲唔公平，希望政府好好處理。」