林峯暫別舞台 暫別舞台

亞太區最受歡迎男歌星林峯，明年1月26日起舉行一連兩場的《瑞士依波路表矚目呈獻：A Time 4 You林峯演唱會》，經已第四度踏上紅館舞台的他昨日出席個唱記者會，所屬的唱片公司高層吳雨和TVB的樂易玲都有撐場。

會有驚喜

今次的演唱會以時間為主題，雖然當中細節林峯大賣關子，要到時才給觀眾驚喜，但就透露完成今次紅館個唱後，將會暫別舞台休息一至兩年的時間：「其實講休息都講咗兩年，加上明年我有幾部電影要拍，時間上真係分配唔到。」問到這決定是否已得樂小姐肯首？阿峯笑說：「我頭先喺後台有同樂小姐講，佢淨係『哈哈』笑咗兩聲。」

香香在台慶夜於後台不慎跌倒，昨日出席林峯活動時獲男方主動扶實。

林峯將暫別舞台，一眾高層到場撐場。

除了時間上的問題外，阿峯亦補充說：「我會繼續做音樂同出碟，但希望可以畀多啲時間儲吓歌，而且都想趁嗰段時間等自己吸收到嘅知識有得消化吓。」

有新元素

林峯希望經過休息後，將來若再舉行演唱會時，定必有更加多新元素帶給樂迷。談到因黎耀祥為今年視帝大熱，有傳TVB會將「亞太區最受歡迎男歌星」和「最受歡迎男歌星」獎一同頒給林峯，以安慰他失落視帝大獎，他說未聽過相關傳聞，但他聽聞今年勁歌頒獎禮會進行公投。

活動中預先播出林峯跟岑麗香合作，由錢國偉執導的愛情微電影《愛在魅來一分鐘》片段，並獲導演和香香現身支持。對於跟香香合作，林峯稱香香在戲內飾演女鬼，但因為不屬驚嚇片種，對方的開朗性格十分適合。而香香亦表示有幸同林峯合作，笑言拍攝期間未有被他電親。

兩人前晚亦有出席TVB台慶活動，其中在完騷後眾藝員影大合照時獨欠林峯，事後阿峯稱因冇人通知，到知道時已經換了衫：「唔緊要啦，成日都有機會影。」至於在後台不慎跌到的香香，表示跌傷腳跟，但已無大礙。

文：音樂組