顧嘉煇快開騷緊張心跳
年近八十歲的樂壇教父顧嘉煇，將一連六場在紅館舉行「顧嘉煇大師經典演唱會」，距離開騷只得兩星期，昨日煇哥接受訪問，對於相隔12年再踏紅館舞台，他坦言：「都有啲緊張，音樂對我冇壓力，但上台面對住咁多觀眾同鏡頭，個心卜卜跳，講嘢都唔流利，咁多年都克服唔到，呢個性格好難改。」
個唱上，由十多位巨星級歌手輪流演唱煇哥的經典作品作致敬，而煇哥會在開場及結尾部分擔任樂隊指揮，他笑言此舉似足皇上。之後煇哥會坐上特別安排的「觀眾席」和他的至親及好友，分享他的音樂成果。煇哥被問到可怕被感動落淚？他笑言：「唔會，係開心事。」
「會係最後一次」
問到是否刻意趕及世界末日前開騷？煇哥竟反問記者幾時是末日，與開騷無關係。雖然個唱內部訂票超額嚴重，足夠開多四場，但因檔期問題未能再加場，煇哥更坦言：「呢次演唱會相信會係最後一次。」
至於煇哥除音樂造藝非凡，原來畫畫亦一樣是「大師級」，因此主辦商丘亞葵有意開完個唱再為煇哥明年開畫展，早年已將部分畫作進行慈善義賣，煇哥笑言：「屋企存貨得十幾幅，咁我要努力畫吓先得。」
文：音樂組