香香唔識「性」 亂磨豆腐

岑麗香(香香)、苟芸慧(苟姑娘)兩位由加拿大回流返港發展的女神,講廣東話經常鬧出不少笑話,不過兩位女神原來真的「唔識性」,香香前晚綵排時突然語出驚人爆出一句:「我哋依家磨豆腐。」即時被高海寧掩嘴,當得知意思後香香尷尬到爆!

香香、苟姑娘與高海寧、何傲兒、王君馨、黃翠如等多位無綫小花前晚在無綫為台慶綵排舞蹈,眾女分為春、夏、秋、冬四個組合,擺甫影相,所有好身材的靚女如香香、苟姑娘、高海寧、何傲兒、許亦妮等被編為夏天組,相信定會性感示人。

高海寧掩嘴

前晚影相時,香香心情興奮,更邊做動作邊說:「我哋依家磨豆腐。」說罷她仍不知「講錯嘢」,此時在旁的高海寧即掩着香香的嘴,怕她講多錯多,隨即跟她咬耳仔解釋「磨豆腐」的意思,香香聽罷知衰尷尬高呼:「Oh,我唔知呀!」她還笑着叫記者不要報道出來,就算寫都不要寫得太差。記者問高海寧如何解釋給香香聽?她說:「我咪話lesbian(女同性戀者)搞嘢囉。」

考慮請翻譯

受訪時香香解釋因為舞蹈中有個動作好似磨豆漿,自己並不知道「磨豆腐」的意思,經此一役,她尷尬的說:「啱啱學到啦。(好在唔係live。)所以live嗰晚我唔會講嘢。」記者提議她不如請翻譯,香香說:「都諗緊,呢排好多嘢做,想搵人幫我翻譯劇本,想搵個女仔。(搵男仔可能唔使錢。)唔好咁講。」

之後趕來綵排的苟姑娘,問她可知道何謂「磨豆腐」時,她懵閉閉的說:「唔知喎,冇聽過呢個。」記者轉告香香瘀爆失言時,苟姑娘說:「我諗佢都唔知係乜,我哋都好單純,加拿大唔會咁形容,一講磨豆腐咪就諗係真係磨豆腐囉!」

文:影視組