Bosco送生日祝福杏兒懶理
黃宗澤（Bosco）與鄧麗欣（Stephy）前晚出席電影《等．我愛你》首映，對於日前胡杏兒生日，Bosco坦言有向舊愛送上祝福，至於有沒有獲回覆？Bosco則透露自己生日也不會逐一回覆，暗示杏兒沒有回應。而杏兒生日當晚，便跟《衝上雲霄Ⅱ》大隊抵達英國拍攝外景，由於天氣寒冷，眾演員着到十足十糉一樣！
而Bosco近期與徐子珊的緋聞鬧得熱哄哄，被問到有否請徐子珊來？他表示：「嘩，講到咁遠，（佢上次否認戀情否認到眼濕濕喎！）我都覺得唔好意思！」談到無綫最近推出由他主演的倉底劇《上海傳奇》谷人氣，Bosco表示：「係咩，唔知呀！（有無信心攞視帝？）無信心，我自己睇好祥仔（黎耀祥），佢係我半個師傅！」
叫小方捧場
至於前晚首映禮，除電影公司高層黃柏高、演員森美等到場外，樂易玲、曾志偉、陳嘉桓等亦有現身力撐！Stephy被問到有否叫男友方力申來捧場？她笑言：「有叫，佢都喺香港但唔知嚟唔嚟！（做乜咁生外？）唔係，只係我無問佢嚟唔嚟，唔嚟都唔緊要，遲啲買飛睇囉！」
文：影視組