富黛戀預支蜜月情侶篋出閘

郭富城（城城）與熊黛林（Lynn）的「富黛戀」發展六年，感情愈來愈明朗化，無論Lynn或是城城的生日，兩人均爭取一齊度過，現行動更升級，齊齊預支蜜月。曾揚言50歲前結婚的城城，上月26日47歲生日，他與Lynn在25日齊齊飛馬爾代夫慶祝，度過8日的甜蜜之旅，昨日兩人雙雙回港，雖刻意前後腳離開機場，但把臂同遊已是鐵一般的事實，可見兩人感情已到開花結果階段。

讚賞創意

昨日約兩點，戴上黑超的城城雖急步而行，但難掩喜悅之色，記者祝賀城城生日快樂，他友善地說：「多謝，要上車啦。（收到Lynn咩生日禮物？）趕住做嘢。（玩得開心嗎？預支蜜月？）咁有創意？都幾好笑。」被笑指去馬爾代夫也撞到fans被拍照，他扯開話題說：「返嚟我會宣傳多啲工作，包括香港、北京。（有冇潛水？）你咁有創意，我點答你？你哋已經分布晒機場，好叻，好似私家偵探，拍戲都唔使落咁足本。（Lynn幾時返？）你問番佢啦。」被笑指叉足電放鬆心情，他笑說：「其實咩都係你哋講，平時又話對方點，又話攻城、圍城、焚城，好彩我仲企喺度，不過今次係特別有創意嘅諗法，好得意，講晒啦。」

郭富城再度被圍，不過今次圍城的不是女友，而是守在機場的傳媒。	熊黛林笑容靦覥，對旅行的詳情三緘其口。	富黛二人日益合拍，同樣向在場記者揮手道別。

城城走後15分鐘，Lynn才步出機場。Lynn自己推着行李，其行李篋被發現與城城的乃同一款式。Lynn同樣戴上黑超，全程笑得十分甜蜜，被問到為甚麼不與城城一齊出來？她表現得不知所措，笑說：「我放假啫。（預支蜜月？）冇冇冇，好多日冇睇新聞啦。（想先生仔後結婚？）唔好講咁遠。（有結婚計劃？）冇冇冇。」至於送甚麼禮物賀城城，她嬌嗲說：「你問佢啦。」

滿足現狀

被問到是否正式公開戀情？Lynn含糊的說：「嗯……辛苦晒，冇諗咁遠。」而城城有否向她求婚，她笑而不答，至於之前送3卡鑽戒是否求婚？她撒嬌說：「我坐咁耐飛機，好累呀，畀我返去休息吓啦，總之放假好開心。」當記者要稱呼她做「郭太」時，Lynn笑着說：「唔好，千祈唔好。（城城話50歲前結婚？）呢個真係要問番佢。（你意願點？）依家開心就夠，多謝大家關心。」

Lynn回家後，在微博上寫上「有時候，愈簡單的東西就愈能帶來滿足感」，對現狀相當愜意。

文：名人組