錢國偉腩製港版Psy

Psy的《江南Style》截至昨日已達逾4億點擊率，其「騎馬舞」亦成為個人招牌舞姿，世界各地倣效者眾。古巨基及鄭伊健在一次吹水中忽發奇想，找來錢國偉扮「港版Psy」，三兄弟齊齊做導演拍成《HongKong Style》，並加入坐電車、搭港鐵、到馬會買彩票、執膠粒等香港元素。由於三人在圈中人緣甚好，曾志偉、賈曉晨（JJ）、錢嘉樂、林曉峰等友情客串，卡士強勁。加上錢國偉無論樣貌及身形與Psy極為相似，故其舞姿雖然生硬，前日片段上載YouTube仍好評如潮。

拍膊頭友情演出

基仔昨日接受電話訪問時講述創作緣起，他說：「有次同伊健做gym，見電視播Psy，覺得同錢國偉好似樣，我哋吹水話搵肥仔（錢國偉）扮佢，拍條二次創作。伊健話：『肥仔入行係想做幕前，依家圓佢明星夢。』跟住我哋捉咗肥仔開會，起初純粹為好玩，冇budget，點知愈拍愈有要求，多謝志偉、林曉峰、排舞師、機器、燈光、效果手足，拍膊頭友情相助，我哋好少錢拍咋，出嚟好似大製作咁，成件事由吹水到完成，只係兩個星期嘅事。真係感謝所有人陪我哋一齊癲，萬二分感謝！」

錢國偉出名多「囡囡」，一聲令下拍MV，眾女即乖乖到場跳騎馬舞。	為MV做導演的基仔（左）與伊健拍攝ＭＶ時指手畫腳，非常認真。	HK Style Vs 江南Style：曾志偉 原裝電梯瞓地戲由原版韓國諧星盧洪哲演出，港版則由影帝曾志偉及鄭伊健扭身扭勢扮演，卡士非常強勁。

基仔更大爆錢國偉在片場被「炳」，他說：「肥仔平時喺片場鬧得人多，今次被我同伊健鬧餐死！佢舞又唔好，演戲經驗又少，應該專心做好演員嗰份，點知又走去理其他嘢，忟到我同伊健『炳』佢！佢都有今日，依家個個睇完都話搞笑！（你同伊健出鏡咁少？）我哋本來冇諗住出鏡，係肥仔叫我哋出鏡撐佢，我條腰有舊患，今次係冒危險去跳。」

鄭伊健	錢嘉樂Vs韓國小孩 Psy在沙灘曬太陽時，有小孩陪舞。而香港版「突變」成大隻成人的錢嘉樂，模仿小孩七情上面的演繹非常搞笑。	林曉峰Vs劉在石 韓版有「黃衫仔」名嘴主持劉在石與Psy鬥舞，香港版則有林曉峰，雖然林曉峰跳得比較生硬，但招積表情絕不遜色。

否認賀伊健結婚

扮「港版Psy」入型入格的錢國偉則說：「今次其實係我幫古巨基、鄭伊健完成導演夢就真，我順手過吓歌星癮。（基仔話你舞姿生硬？）我冇乜排舞，張就吓，玩gimmick啫！好多朋友分文不收，友情客串。志偉犧牲打golf時間，JJ就拍咗兩日，錢嘉樂忙緊搞婚禮都嚟幫手。（會為慈善現場表演騎馬舞？）我擔心記唔到舞步，考慮吓。（傳條片係賀伊健結婚？）梗係唔係！要賀都賀錢嘉樂先。」

文：影視組