徐濠縈喜本地薑潮入巴黎

【劉慰思巴黎直擊】本地薑潮牌GROUND-ZERO聯同本港鞋履品牌STACCATO衝出亞洲,登上國際舞台,成功殺入巴黎時裝周,於當地時間9月30日舉行時裝騷,徐濠縈、丁子高、林莉及胡敏珊等香港潮人均現身支持,力撐自己人。

巴黎是世界時裝之都,能躋身巴黎時裝周做騷是莫大光榮,本港兩大品牌GROUND-ZERO與STACCATO為港增光,攜手於當地舉行2013春夏騷。GROUND-ZERO創辦人兼設計師Philip Chu及Eri Chu兩兄弟雖然首次在巴黎時裝周登場,但已獲得大批中外傳媒關注,現場座無虛席,場面熱鬧,徐濠縈、丁子高、林莉及胡敏珊也專程到場打氣。

丁子高被千嬅詐型

策劃促成兩個品牌合作的丁子高對此大感興奮,雖然慘被太太楊千嬅詐型,但也覺值得,他苦笑說:「我真係好緊張,初次搞巴黎時裝騷。我老婆剷到我死,話BB出世後首個中秋節都唔喺屋企。呢幾日陪月請咗假,千嬅第一次同BB沖涼,BB太重,千嬅差啲整親條腰,佢仲整咗三段短片畀我睇。」問到會否買衫給千嬅補鑊時?他竟說:「老婆有叫我買,但我都唔知買乜,買都買畀個仔先。(個仔重要啲?)老婆都好重要。」

想同兩設計師合作

至於徐濠縈雖忙於為時裝店入貨,但也專登抽空出席:「我同兩個設計師好老友。今次可以見證香港首個設計師打入巴黎時裝周,仲同好多有名設計師有排名。(會唔會同佢哋合作?)唔知佢哋想唔想,我真係好開心,覺得香港人可以衝出亞洲。」她稱在中秋前已收到老公陳奕迅打來祝她中秋節快樂,笑言不知對方是否記錯日子。

而林莉直言非常榮幸獲品牌之邀出席時裝騷,她說:「香港品牌可以喺巴黎做騷係香港人嘅驕傲,我可以成為座上客都覺得好榮幸,今次亦係我第一次喺巴黎睇騷,有雙重意義。為咗今次盛會,我喺香港有買定法文書,學咗幾句簡單嘅法文。」