Kelly心繫兩子 趕返歸過節

Kelly於巴黎時間9月28日出席當地舉行的Christian Dior 2013春夏時裝騷，她穿着紅色長裙配以七吋platform shoes，見她行得小心翼翼，出入也要助手與經理人鍾珍扶着。Kelly甫到場即被過百中外傳媒包圍採訪，場面墟冚，大會更安排Kelly與Dior Homme設計師Kris Van Assche同坐在第一行的中間位置睇騷，騷後，Kelly更有機會與品牌新任創作總監Raf Simons在後台合照，受品牌高度重視。

Kelly笑言自己第一次着七吋高的鞋，並對Raf Simons的新作十分期待：「我之前都睇過品牌高級訂造服，Ready-to-Wear系列就首次睇。我第一次睇Raf Simons，我諗同之前John Galliano嘅設計會好唔同風格。」

陳慧琳與Kris Van Assche坐第一行睇騷。

夏雨與妻子袁泉拍拖到場。

每日視像同傾電話

不過，Kelly今次只會在巴黎逗留三天，她解釋：「因為要趕返香港同囝囝、老公過中秋。（有冇同囝囝視像？）每日都有視像同傾電話，老公仲會不停傳送囝囝嘅相畀我睇。（囝囝知唔知你去咗邊？）知道，佢仲叫媽媽快啲返。（會唔會買禮物畀兩個仔？）會，一陣先。（買畀大仔定細仔？）細佬通常着阿哥嘅衫，其實屋企好多衫都係朋友送。」Kelly稱有興趣設計童裝，之前曾設計手袋及絲巾作慈善用途。談到工作動向，Kelly說：「我希望快啲錄音，趕及喺年底推出新廣東大碟，我之前掛住生仔，已經有四年冇出唱片喇！」

孫儷盛裝出席。	陳慧琳與Raf Simons於後台合照。	法國導演洛比桑亦前來睇騷。

中外影星慕名而至

另外，由於今次系列是Raf Simons上場後首作，世界各地影星也慕名而至，包括饒舌歌手Kayne West、荷里活影星羅拔迪尼路、法國導演洛比桑、內地名模呂燕、內地女星孫儷、夏雨和袁泉夫婦、前日本國腳中田英壽等，可謂星光熠熠。