趙式芝：人與人應該包容
趙世曾女兒趙式芝（Gigi）自與波爾錶太子女楊如芯（Sean）公開同性婚訊後，趙世曾發聲明否認愛女已婚，昨日再度強調女兒不是同性戀者。Gigi昨日回應既尊重父母亦愛另一半，事實已在眼前，不願再多解釋。
Gigi與Sean上周四（20日）在活動上公開兩人已婚，還在法國教堂行禮及影婚紗照，本報在Gigi的Zizi Workshop早前舉行的畫展特刊上，發現她的簡介相片，打扮得高貴又隆重。據知Gigi此幀黑白照片，正是她的新娘造型，Gigi坐在車內正出發到教堂行禮。
沒有影響父女情
趙世曾昨午約二時回公司，即被大批傳媒包圍，他繼續否認女兒結婚及表示她沒有同性戀傾向，還大讚Gigi說：「智貌雙全嘅女仔，希望有如意郎君追佢，佢冇人追我都擔心，同性朋友只係伴，一齊玩一齊去旅行，唔好有其他關係，邊個有意追求，都會幫佢同支持佢發展，金錢上都會，唔理香港、大陸或外國男士。（Gigi結咗婚？）同佢傾過，佢冇，我亦探討過佢嘅性取向，覺得佢冇同性戀傾向。（如果將來同Sean一齊呢？）相信個女大個，呢個唔係最終目的。（反對佢哋一齊？）只係朋友嘅層面我唔反對，如果唔係就梗係唔好。（有冇影響父女感情？）我哋感情好好，佢好愛爸爸，我哋都愛佢。」
重金招婿娛樂性
記者致電Gigi問及爹哋指她沒有同性戀傾向？她說：「畀佢慢慢去思考。（重金招女婿？）非常具娛樂性？哈哈！（對男性係咪冇興趣？）唔回應。（如果因事件唔分身家畀你，你介唔介意？）呢樣從來都唔係我決定，我會支持爹哋覺得值得分嘅人。我好錫父母，亦尊重佢哋，唔想佢哋唔開心，但亦愛我嘅另一半同我嘅生活。人與人之間應該係包容，唔應該有不必要嘅爭執，事實真相已好清楚，再講落去都係娛樂大家。（被夾喺中間，會唔會好辛苦？）唔會，反而覺得好幸福，大家都咁着緊我，不過表達愛嘅方面比較特別，用自己認識嘅方面去保護我。」而Sean在電話中亦不願多談：「我哋尊重老人家，唔想多講。」
文：名人組