JC喪冧鬍鬚Bond 聖誕見家長

昨日讀者Ceci爆料，提供兩張JC與男友Bryce Bond的照片，一張是兩人的大頭自拍照，照片中兩人頭貼頭，JC一面甜笑冧樣，靠着男友，而負責自拍的Bond一面陶醉的樣子，大晒恩愛；而另一張是二人與一大班外籍朋友的合照。另外，本報在Instagram上亦發現多張JC與男友的照片，Bond經常扮出趣怪表情，其中一張是拍照者瞓身擘開大腿去拍攝Bond閉目打坐的照片，角度好搞鬼。

媽咪唔會有意見

昨日JC穿上短褲與崔豪進及趙勁皓行騷，她自言喜歡這樣的打扮，不過公司就要求她多穿裙子及高跟鞋，這樣才像一個model。問到男友可喜歡她穿高跟鞋？她說：「佢都鍾意，因為佢有六呎二吋高。」

她透露男友名為Bond，和母親一樣在美國，但還未見家長，因此很希望可以安排媽媽及男友來港見面，她笑說：「媽咪好緊張，好想見佢，（媽咪對你男朋友有乜意見？）冇乜，佢對於我嘅男友一向都唔會有意見，佢淨係會忠告我要搵個值得信任嘅人﹗我希望安排佢哋喺一個特別嘅日子見面，例如聖誕節，我都希望快啲﹗」

call男友整廁所

JC透露男友是建築師，懂得起樓，所以十分擅長修理家具，而自己就只會破壞，她笑說：「好似我屋企個廁所整壞咗，就叫佢嚟修理！」

JC經理人表示並未見過JC男友，問到JC是否11月飛去見男友？她說：「JC另一個細妹就快生BB，會去芝加哥睇佢，可能順道會去見男友，其實JC好認真工作，大個女識得分清楚。」

採訪：名人組

爆料編號：ireport_00031634