張文慈曾為愛犬撲水醫病

曾被狗咬的張文慈(Pinky)深信犬隻是最忠心的朋友,已辭世的愛犬更曾與她共度時艱,直言覺得有時狗比男伴更誠實可靠,而她亦曾在最潦倒時問朋友借錢,救活身患重病的愛犬。

Pinky早前帶同兩隻愛犬應邀到凱旋德國狼狗專門店拍宣傳照,現場一隻價值數十萬的名種大狼狗訓練純熟,令她眼界大開。

Pinky不諱言自從離家獨居後,前後餵養過3頭犬,最早領回家的一隻年前離世,回想起來她不禁慨嘆謂:「記得好耐之前,佢試過有病,醫生話未必救得到,但如果要醫,醫藥費起碼3萬,叫我要諗清楚。當時係我最窮困嘅日子,最終要問朋友借錢,先搞得掂,好彩後嚟佢好番,而我哋嘅生活亦愈嚟愈好。」

死撐見主人最後一面

Pinky形容愛犬與她「同甘共苦」,難怪對方因年紀老邁去世前一刻,她與傭人往見最後一面,心情複雜難以形容,然此時奇迹卻發生:「醫生話佢唔得,點知我去到佢睜開眼望住我,我知佢唔捨得,我就同佢講:『我知你乖,唔好掛住嘞﹗』佢先吞下最後一口氣。」靚女不諱言很難接受與寵物生離死別,心情相當矛盾:「佢哋好可愛,但又得嗰十幾年命,有時真係好hurt。」

另外,早前Pinky往內地登台,竟遇上有人拿着她早已約滿的代言產品(仍選用她的照片作招徠),邀她合照之餘還笑指她是永遠的代言人,事件令Pinky氣上心頭:「張約幾年前已告一段落,我亦已有新嘅代言品牌。我上佢哋嘅網站,發現仲有用我嘅相。之後我決定電郵佢哋了解,最終得到個答案係佢哋唔會再用我嘅相,但我會保留法律追究權利。」

文:影視組

攝:沈健程