張慧雯擺款摑宋熙年 驚到手震

無綫藝員宋熙年和張慧雯最近齊齊擺款扮「阿姐」,在新劇中分別飾演年輕版的汪明荃和黃淑儀,沒料開工第一日就拍攝掌摑戲,出手摑人的張慧雯害怕得手震震,反過來要被摑的宋熙年教路。

宋熙年和張慧雯首度合作在劇集《巴不得媽媽》飾演年輕版的汪明荃及和黃淑儀一對歡喜冤家,戲中經常為啖氣大鬥法。開工第一日張慧雯便要怒摑宋熙年,但出手摑人的張慧雯反而要捱打的宋熙年教路,張慧雯說:「打人原來好驚,自己都手震震,不過熙年好好,反而教番我點樣摑佢,佢話畀人摑好有經驗,情願出力啲拍一兩次完成,好過捱多幾巴。」

黃淑儀抽空教路

張慧雯謂與黃淑儀之前在《On Call 36小時》合作過,扮演對方相對容易掌握,她說:「淑儀姐好好,特登抽時間同我研究劇本,又畀佢以前啲相我睇,原來我哋笑起嚟好似樣。」

宋熙年在劇中扮阿姐汪明荃,事前也做足功課上網欣賞阿姐的作品,其中阿姐年輕時在《家變》的省鏡靚樣令她留下深刻印象。問到宋熙年可有向阿姐請教?她說:「冇呀,因為我哋唔會同場開工,所以唔敢打搞佢。」

愛上拍劇冇底線

宋熙年講到拍劇難忘事時說:「印象最深當然係第一日開工就要畀張慧雯掌摑。自己拍完呢套劇發覺真係好鍾意拍劇,希望可以多啲拍劇機會,做乜角色都冇所謂,賣魚妹、差婆、扮低能都得,只要係角色需要可以話冇底線。」

採訪:影視組

化妝:Sammy Lam@Zeal.Image

髮型:Ted Yeung@II.Hair