劉家輝泰妻 反擊大控訴
著名武打明星劉家輝（原名：冼錦熙）去年中風入院，上月有指其第二任泰籍妻子趁他病重，欲謀奪家輝財產，當中包括數百萬元物業，由於指摘有損名譽，劉太與兒子冼峻龍昨於泰國首度開腔回應傳聞，她直言從沒謀奪劉家輝之家產，並爆出上月尾開始，有人阻止一對仔女跟父親見面，令她深感氣憤，決定要為仔女出頭，希望仔女有日可與父親重聚！
著名武打明星劉家輝在影視圈縱橫逾三十載，並憑荷里活電影《標殺令》（Kill Bill）於國際影壇打出名堂。去年8月，家輝意外跌倒中風入院，導致半身不遂，令一向堅強硬朗的他大受打擊，曾一度意志消沉，幸而最終都能從陰霾中走出來。今年開始，家輝之康復情況理想，還正步向復原，惟最近卻傳出劉太教唆一對仔女向患病父親索錢，並欲吞佔家輝位於堅道的800多呎物業，該物業市值近750萬港元。對於有關負面傳聞，令一向低調的劉太決定不再啞忍，昨日帶同兒子在泰國芭堤雅接受本報獨家越洋專訪，跟隨劉家輝21年的她剖白自己絕對沒有因病離棄家輝，亦澄清沒有貪錢、貪屋，還讚家輝是一位好父親，很疼錫兒女，只是性格不合令兩人未能走下去！
記：記者 劉太：劉家輝第二任太太
冼：兒子冼峻龍
記：近期好多傳聞，有報道話你好貪錢，趁劉家輝病嘅時候攞晒佢啲錢？
劉太：冇啲咁嘅事！我1991年同佢喺香港簽紙結婚，之後生咗一仔一女，可惜生咗個女之後，發現我哋嘅性格唔係好夾，佢好鍾意飲酒，性格比較花弗，一直以嚟我都係靠信仰同一心諗住湊大一對仔女呢個想法，嚟維持呢段婚姻，直至2009年，家輝話要送個仔去新加坡讀書，咁我就覺得係咪應該一切都重新開始，所以喺劉家輝安排下，我簽咗離婚協議書，當時我同佢講，我願意同佢離婚，但我哋住緊層樓（即堅道物業）要將一半業權轉名畀我大仔冼峻龍，我希望一對仔女有個保障，然後我就去咗泰國居住。
記：咁你同劉家輝係咪已經正式離婚？
劉太：我都唔清楚，我曾經打畀香港嘅律師，佢話劉家輝轉咗律師，所以我都問唔到。
即時返港照顧
記：劉家輝中風之後，你有冇返去睇過佢？有冇問過佢攞錢？
劉太：佢中風之後，我立即由泰國返嚟香港照顧佢，因為我經濟唔係咁好，返嚟之前仲向親友借咗2萬蚊做生活費，其實我簽離婚紙嘅時候，自己冇要求一分一毫，點會貪佢嘅錢！只係我前年因為做生意周轉不靈，曾經向家輝借過30萬，當時家輝未中風，佢中風之後，我從來冇同佢講過要錢，亦冇追問過堅道層樓轉名嘅問題。
記：有指你哋想帶劉家輝去泰國醫病？
劉太：其實喺今年3月，我曾經提出過接家輝去泰國醫病，始終我喺泰國照顧佢會方便啲，點知就由嗰陣時開始，有人用盡方法阻止我送家輝過嚟，始終我同家輝分開咗，所以我都冇堅持。不過上個月尾，有人從中作梗，搞到連我對仔女都探唔到爸爸，再加上有妻離子散、趁病謀財嘅消息傳出，我覺得真係有需要講清楚一切！今次接受訪問嘅原因係：一、澄清不實報道；二、希望啲仔女能夠探爸爸，我覺得仔女見父親係好正常嘅事，呢啲骨肉親情，冇得剝削。至於邊個從中作梗為存厚道，我唔想多講，只係想對仔女能夠見到爸爸。
被拒入護老院
記：幾時開始探唔到爸爸劉家輝？
冼：去年11月，我喺新加坡返港，經常日接夜咁陪伴爸爸，好希望佢快啲康復。但係自從今年3月，媽媽提出過接爸爸去泰國醫病後，喺我哋親友之間出現好多奇怪嘅傳聞。上月尾，我爸爸由太子居所轉去護老院住，都冇人通知我，我係用咗好多方法先知爸爸住喺邊，我想去探佢，但喺門口已經被護士截咗，話我爸爸唔想見人，我唔知發生乜嘢事，只係好想探爸爸！好想知道爸爸依家嘅情況！
記：你哋依家經濟有冇問題？
冼：上年爸爸中風，我就決定完成咗中七就停學一年，諗住留喺香港照顧爸爸同妹妹，雖然爸爸透過經理人每個月畀5,000蚊我哋兄妹嘅生活費，但為咗減輕屋企負擔，我依家已經搵咗一份侍應工作，生活暫時冇問題。
家輝好錫仔女
記：劉家輝係咪一向都好錫一對仔女？
劉太：好錫！一對仔女由細到大要啲乜嘢，家輝買到一定買，每個星期日又會帶佢哋出去飲茶行街，佢哋生日仲會搞好大型嘅生日派對，為嘅都係氹一對仔女開心。
記：你同劉家輝點識？
劉太：我同劉家輝20年前透過朋友喺泰國認識，當時大家都冇乜印象，但幾個月之後，我同妹妹去香港玩，我妹妹想去睇明星，劉家輝就帶我哋去片場同啲明星影相。之後家輝去親馬來西亞、泰國拍戲都會同我約會，慢慢就產生感情，1991年決定結婚，家輝為咗令我嫁得風光，除咗喺香港擺酒，仲特登喺我泰國嘅鄉下擺咗50幾圍，喺當時嚟講，真係好犀利！
劉太與冼峻龍一再重申今次願意越洋接受本報訪問，全因上月尾未能探望劉家輝，冼峻龍坦言很希望能與劉家輝父子團聚，亦很想知道爸爸現在的康復情況，求的只是讓自己、妹妹及母親可以安心。
殺入荷里活參演《標殺令》
年屆57歲的劉家輝自小跟隨劉家良父親劉湛學洪拳，並跟劉湛上契，家輝憑着一身好武功縱橫影圈38年，在七、八十年代成為邵氏電影公司力捧功夫片打星，至今參演超過百部電影和電視劇，當中他扮演的光頭武僧角色，令人印象難忘。
出道期
1973年，家輝參與劉家良投資電影《殺出重圍》加入影壇，至1978年他憑演出電影《少林三十六房》聲名大噪，除了成為當年香港的十大賣座片，更獲不少國際回響，有日本影迷為他成立影友會。
當紅期
家輝憑《少》片走紅後，自此成為邵氏的力捧小生，而他的光頭形象深入民心，數十部電影裏他幾乎演武僧，而他亦嘗試當上導演和監製等崗位，事業如日中天。
外闖期
2003年獲邀拍攝荷里活電影《標殺令》系列，第1集飾演瘋狂殺手，第2集則飾演武術高人。
收成期
2005年在廣州舉辦邵氏名片海報照展覽，收了鄭佩佩女兒原子鏸為第1位徒弟，其後亦收了13位徒弟。
文：影視組