李璨琛街童變社工 閹出新戲路
從電影圈走進公仔箱，李璨琛突破性地在劇集扮演社工角色，粉碎以往的滑稽形象！而他更與同劇演員打成一片，不時在戲裏戲外大玩小學雞遊戲！他還自爆小時候最愛在街上流連，是個有分寸的街童。
拍電影出身的李璨琛（Sam），其蠱惑仔、搞笑形象深入民心，從此戲路被定型，不過皇天不負有心人，Sam最終遇上好角色，被無綫監製睇中，在劇集《怒火街頭》系列擔演樂於助人的社工，連他也大嘆難以置信：「一聽到社工呢個角色已經好驚訝，因為有生之年都未試過做，我都問得唔得o架？之後同女友、朋友講呢件事，佢哋都笑咗出嚟，仲叫我唔好玩！不過就係因為佢哋嘅反應，所以我更加想做好呢個角色！」
大玩「小學雞」遊戲
除演出有突破，Sam自言最開心莫過於跟劇中的鄭嘉穎、林子善、曹永廉打成一片，四人更童心未泯，不時大玩「小學雞」遊戲：「四個男仔走埋一齊竟然玩『閹』，黐線o架！加埋百幾歲都『閹來閹去』，但喺戲入面都係咁玩，仲要玩得好開心！其實大家內心可能都有好多嘢想釋放出嚟，但一直遇唔到對手，所以今次真係啱晒！」
提到童年，Sam都自言是名街童，雖然小時候很貪玩，但不至於壞事做盡，他說：「都未去到要社工輔導嘅，畀訓導罰留堂就梗有，以前最鍾意喺街度流連，然後同其他朋友飲酒、玩啤牌、踢波，不過我就好啲，玩完識返屋企食飯，夜晚就唔出街。」
文：專案組
攝：黃叔榮