蔡卓妍膽大Belt天

可別小看一條Belt,它對成身打扮有畫龍點睛之效,不論是Jambo Belt或是幼Belt,都由今年春夏Hit到秋冬,尤其近年流行高腰褲和裙,加了Belt可令身形比例更靚,顯得腰短腳長,又能修飾腰形,令腰看來更纖幼,整個造型也增添了層次感,難怪圈中一眾女星都愛用Belt。

修身的服裝可以配粗或幼的Belt,相反在鬆身服裝上,大膽配上粗Belt更有助修腰效果。名模陳嘉容(Eunis)就大讚蔡卓妍的Jambo Belt打扮型格突出,徐濠縈亦有型有心思。

蔡卓妍

「條Belt好特別,修腰效果好好,令佢個人更瘦,身形比例更靚。下身嘅搭配同顏色都好Match,條Belt襯番對鞋,杏、金色嘅下半身襯番黑、金色嘅鞋。上身襯件Colourful嘅衫好突出,成個Total Look好重層次感。」

Angelababy

「合格,斯文淑女Look,條黑色幼Belt令到白色裙有層次感。不過呢身打扮對Baby嚟講,感覺有啲過分老積,浪費佢嘅青春本錢。」

徐濠縈

「好型,幾得意,如果佢襯條Colourful或紅色嘅Belt,就會太多嘢,花喱花綠。佢依家就有心思咁襯咗條透明Belt,整體恰到好處。」

陳慧琳

「Kelly嘅衣着從來都冇問題,條Belt恰到好處、層次分明,對鞋都好襯,大方得體,感覺舒服。」

李小璐、阿佘

佘詩曼與中國女星李小璐不約而同穿上Dior同款Cocktail裙,陳嘉容就認為李小璐穿得比阿佘好看:「李小璐由化妝、髮型到配飾各樣都同條裙好襯,由頭到腳都好靚,不過條裙嘅長度顯得佢個人好矮,如果改到好似阿佘呢種長度就啱喇。阿佘就應該加番多啲配飾,會令Total Look更加突出。」

雨僑(前名:羽翹)

「OK,條裙同條Belt都Match,呢隻顏色亞洲人比較難着得靚,佢Carry得唔錯,露腿幾養眼。」

胡杏兒

「佢着條裙褲娘娘哋,就算加條幼Belt都冇身形。如果換條漆皮粗Belt,換對露趾涼鞋會靚好多,仲要加番啲配飾,依家成個人好黑,得兩條手臂。」

鄭融

「成身配搭格格不入,條Belt好Cyber,但襯咗對草織Platform鞋,條裙又似OL。換條吊帶或者圓領裙,唔好恤衫領,再換對Cyber嘅超厚Platform鞋或者Ankle Boots會好好多。」

陳嘉容Profile

香港著名模特兒,曾為各大國際品牌行時裝騷,在時裝界打滾多年,對時裝方面的理論還是實戰都難不倒她,近年更為電視時裝節目擔任主持,化身Stylist教人配襯衣着打扮。