吳鎮宇躁爆鬧人火燒夜中環

圈中出名躁底的影帝級人馬吳鎮宇，前晚與陳法拉在中環拍攝無綫新劇《衝上雲霄II》，由於一波多折，即時爆發上演真人版《怒火街頭》，恍如機關槍上身般向PA（助理編導）及圍觀途人開火！

眾人目瞪口呆

事緣比原定時間早了一粒鐘抵達中環的鎮宇，也許因與劇務未有溝通清楚，令他兜了一小時冤枉路，故甫落車即口黑面黑向PA開火謂：「唔好話我知又去番頭先嗰度拍呀，我兜咗好耐o架嘞！」鎮宇此言一出，令現場所有人目瞪口呆，但無辜兜了一小時冤枉路確實令人勞氣。

有靚女法拉呵番，鎮宇都唔識笑。

經過一輪拍攝，鎮宇終於笑番仲伸晒脷。

由於日來天氣悶熱，身穿筆挺西裝的鎮宇大汗疊細汗，他緊張地不斷着化妝人員幫忙抹汗，以免影響拍攝進度，但因星光乍現，現場吸引了一班途人圍觀，有人不識趣用閃光燈拍照，令鎮宇再度無辜辜地與法拉狂食NG。一火未平一火又起的鎮宇，未待助導出手率先向途人怒吼：「唔好再閃燈喇！」成功令現場恢復平靜。

Rock妹打扮的陳法拉，調皮的以rock友手勢「回敬」鎮宇，認真搞笑！

有圍觀途人用閃光燈拍照，連累鎮宇及法拉食NG。

雖然心火盛，但鎮宇依然投入工作，拍攝期間他更即場爆肚向法拉講對白說：「對腳好似跪過玻璃咁，又瘀又黑。」法拉卻處變不驚以rock友手勢「回敬」，場面搞笑！

爆肚為搞氣氛

經一輪拍攝，鎮宇明顯回復靚靚心情，他受訪時坦言因與PA溝通出現問題才發忟憎：「其實一個鐘頭前我到咗，同劇務講咗，點知又唔見佢哋，激氣到吖！（有冇後悔接劇？）又唔會，拍戲梗有呢啲情況出現。」他又指爆肚純粹為搞氣氛：「劇本有啲嘢唔好玩咪玩吓囉！」並否認因無綫鬧編劇荒才要親自改劇本，他說：「我都係TVB出嚟，不嬲都係咁執。（有啲亂？）習慣咗。」

至於法拉雖全程未及鎮宇出位，染了一撮金髮的她全黑rock look打扮，還戴了rock味十足的耳環、手鏈、手鐲兼搽了黑色甲油，相當搶眼。法拉說佩戴飾物全由朋友所借，她笑言最rock的年代是在外國讀書時候：「我修到條眉好幼，仲搽啲又紫又啡嘅唇膏。」談及火爆鎮宇，法拉大讚他好人：「只要自己做晒功課，讀熟劇本就OK，佢好好，現場會教我好多，咁耐以嚟都未鬧過我，上次拍電影都冇。」

文：影視組