鄭則士贏身位 黎耀祥一額汗
曾分別否認不和傳聞的「視帝」黎耀祥與「影帝」鄭則士，昨日為劇集宣傳時果然相見甚歡，有傾有講；玩遊戲時，祥仔更誇讚Ken哥有分量，完全粉碎傳言！
黎耀祥、鄭則士（Ken）、唐詩詠、周家蔚等昨日為劇集《造王者》宣傳，之前有指祥仔與Ken哥不和，但見二人昨日言談甚歡，除了當眾玩拗手瓜外，玩扯大纜時Ken哥要孭姚子羚，還笑問她：「你騎過大笨象未？」令全場爆笑。
暗嘲田蕊妮重磅
至於祥仔孭田蕊妮時一額汗，更笑言戥杜汶澤（田蕊妮老公）孭起頭家辛苦，阿田則即反擊：「頭家係我孭起o架！佢係孭我。」而黎諾懿就不時照顧懷孕的家蔚，並應要求小心抱起她。Ken哥及祥仔可謂影帝鬥視帝，在劇中大鬥演技，祥仔受訪時稱對手很重要，又大讚Ken哥是有分量演員，二人曾分別於電影及電視劇合作，相當有默契。
周家蔚「以身作則」
肚凸凸的家蔚透露前晚與好友文頌嫻、姚樂怡等到佘詩曼家吃飯，由「佘媽」作廚，令她狂吃三碗飯，大感滿足！她謂：「我同文女坐埋都傾買補品、訂濕紙巾嘅嘢，我幫咗鍾麗淇、麥家琪佢哋訂埋，（有冇廣告商招手？）依家臍帶血、奶粉、BB車都有sponsor，不過自己心急買咗兩個奶樽。」問阿佘見到眾女都已婚又大肚會否心動？家蔚說：「都鼓勵佢快啲，（佢有冇新戀情？）冇呀！我哋咁八，有都八到番嚟啦！」家蔚稱預產期是明年2月5日，會揀2月1日開刀。
另外，負面新聞多多的朱慧敏被指態度囂張，拍《愛‧回家》時竟教黎諾懿做戲，諾懿否認此事，還謂會支持拍檔。
文：影視組