蔡志明中Double Jackpot：發達啦！
玩具大王蔡志明千金蔡加怡前日與陳漢驄拉埋天窗，身為岳父的蔡志明於婚宴期間在台上致詞時，即場爆肚，又向親家大送高帽，笑言十個光頭九個富，新郎和新老爺均是光頭，他這次猶如中了Jackpot般發達了。
前日是玩具大王蔡志明千金蔡加怡（Crystal）與設計師陳漢驄（Jeremy）結婚的大喜日子，一對新人晚上假會展筵開八十席宴請親朋好友，出席婚宴的嘉賓包括李兆基、賭王四太梁安琪、朱玲玲、郭富城、甄子丹夫婦、汪明荃和羅家英、謝賢等。一對新人在台上切結婚蛋糕及以香檳合交杯。新郎首先多謝父母和家人，之後多謝太太Crystal說：「多謝你忍我嘅脾氣，包容我，愛錫我，我搵唔到第二個好似你咁善良、聰明同了解我嘅女仔，冇人可以代替你。」冧爆Crystal。
加怡叫老公做Baby
而Crystal亦多謝父母說：「多謝爹哋媽咪，我會繼續做乖乖女，孝順你哋同埋努力工作。」她又多謝老爺奶奶以及弟弟蔡加讚，最後多謝老公Jeremy說：「Baby，好多謝你送個咁靚咁難忘嘅婚禮畀我，一直遷就我愛護我，令我夢想成真嘅唔只係呢個婚禮，仲係搵到我嘅Perfect husband。」
有個有錢佬做靠山
而新岳父蔡志明上台致詞時就即場爆肚，發揮其幽默本色，向親家大送高帽說：「加怡從細到大都好乖，有日我食早餐睇報紙時打個突，見到加怡同個光頭佬一齊。我哋屋企個個都多頭髮，可能加怡想搵個冇頭髮嘅調劑吓，又或者佢想爹哋下半世舒服啲，十個光頭九個富，等老竇下半世唔使做廠咁辛苦，聰明女。我第一次見Jeremy時一睇，唔係普通嘅光頭仔，係特大o架，呢次發喇！不過加怡同我講話『老竇，佢係第十個嚟。』我唔信，後嚟見埋Jeremy爹哋，嘩，又係光頭，呢次發達喇，18對2仲唔中？仲唔Double jackpot？有個有錢佬做靠山，多謝Crystal，多謝陳生（親家）。」令台下一眾嘉賓捧腹不已。
文：名人組