周家蔚佗B仔勁生腳毛
周家蔚（Janet）昨日穿上低胸連身裙，現身新蒲崗《Mikiki X 戇豆先生 群星反豆O運會》，正式宣布懷孕，但這位新任大肚婆在活動上玩遊戲時卻單腳企，嚇得同場的小儀與金剛猛叫她小心。
Janet忍了三個月，昨日終於可以開懷盡訴首次做媽媽的喜悅，她昨晚接受電話訪問笑言：「我近排生咗好多又黑又密嘅腳毛，朋友話呢啲係佗仔嘅徵兆喎！」
聞燒臘想嘔
Janet昨午出席活動時，見到現場精靈活潑的小朋友，不禁母愛大發，她說：「之前忍咗好耐，依家終於講得，我有咗三個月BB，近排雖然好易攰，但心情好緊張，最搞笑係未證實之前，有次我聞到燒臘味想嘔，天明話要買話梅畀我，我話係都買驗孕棒先啦！後來去照超聲波，天明猛影住個mon，話個BB似佢喎！（鍾意仔定女？）我想生女，可以扮靚又斯文啲。（老爺洪金寶點睇？）佢都好開心，仔女都冇所謂，我又唔係只生一胎。」
磅數冇激增
Janet又否認懷孕三個月體重激增，她說：「我都係115磅之嘛，同我度蜜月嗰時磅數冇變。（上圍升cup？）咁點都有少少嘅，詳細唔知。（要問洪天明？）佢去咗佛山拍戲。」這位廿四孝媽媽自爆為肚中BB犧牲不少，她說：「我依家成日作嘔，但真係嘔就好少，人哋飽到嘔，我係餓至想嘔，以前我鍾意食魚，佗BB之後反而覺得好腥，惟有食魚油補充Omega 3。」
另外，呂慧儀昨出席公開活動，透露一早已知好友周家蔚懷孕，自己亦喜歡小朋友，不過現階段想與老公過二人世界，及積極搵私己錢。
文：影視組