陳靜胸狠護士杜汶澤預告晒股

DaDa、杜汶澤、導演彭浩翔前晚在尖沙咀華懋戲院為新片《低俗喜劇》舉行首映，余文樂、時裝界猛人沈嘉偉、吳千語及o靚模Lavina等均有捧場。DaDa以戲中的爆胸護士造型現身，吸引群眾圍觀，彭浩翔更搞鬼與DaDa玩高炒自拍。

換衫入場免分心

期間DaDa不時用電影紀念品「事業扇」遮擋自己的事業線，她解釋：「我怕走光，件衫太跣，我啲膠紙都甩埋。套戲優先場反應好，導演叫我咁着。今晚有好多男士，我係護士，如果佢哋頭暈身慶可以搵我急救。不過陣間入場睇戲我會換衫，費事累人分心。（票房好再性感啲？）呢件護士衫已經好性感。」

杜汶澤坦言票房大收會露股罅。	Lavina例牌性感出席首映。	陳靜頻頻以事業扇遮擋事業線。

與太太田蕊妮到場的杜汶澤表示：「優先場場場爆，票房已過百萬，希望大家多啲支持港產片。（票房好點慶祝？）DaDa露前面，我呢啲又低俗又三級嘅，梗係除褲露後面事業線啦！」田蕊妮聞言笑謂：「票房過五千萬，露乜線都應該。（你都好性感？）我呢條係水平線。」

想睇邵音音舊作

此外，彭浩翔與DaDa昨日出席《新官人我要》電影放映會，DaDa說：「好想睇番邵音音嘅演出，但嚟到睇唔到成齣戲，會搵碟睇番。」

文：影視組