Mia生剝抹胸Gel硬Avis

模媽Mia（陳靜儀）及Avis（陳偉成）因合作電影傳出緋聞，昨日兩人孖住上到旺角行人專用區出席洗頭水活動《LSnP喜愛起泡Hair Wash Party》，Mia以上身三點式及下身短裙仔示人，大晒驕人上圍，而Avis則半裸晒肌肉，兩人先後為對方Gel頭及洗髮尾，吸引大批途人圍觀，令原本已擠迫的旺角更水洩不通，而身後的賣唱人士更「配合」獻唱尹光名曲《數毛毛》，認真應景！

好耐冇見周秀娜

期間Mia主動為Avis脫衣及抹身，又將泡泡塗在男方胸上，似對男方嗒晒糖，她直言覺得被男士洗頭很浪漫及幸福，又表示喜歡如Avis般頭髮濃密的男士。不過Avis全程木口木臉，硬晒軚表現避忌，未知是否怕女友娜姐呷醋，問到曾否為娜姐洗頭？Avis說：「以前有，但依家佢太忙，都一段時間冇見。（Dry？）咁要做吓Treatment喇！（娜姐不滿你？）唔會，會珍惜相處嘅時間，仲抱怨就會鬧交，如果佢嬲，就帶佢嚟淋水，淋熄啲怒火。」對於早前娜姐獲曼聯球星里奧費迪南送帽，打籃球的Avis笑言要轉行踢波，與對方一較高下，Mia亦笑言不怕見到娜姐會尷尬，更寸嘴說：「大家咁忙，都見唔到啦！我會同佢講我都想要頂帽呀！」

Mia在Avis的巨胸上寫字，笑容滿面，似乎未有留意Avis其實冇乜表情。	沈震軒出盡力抱起松岡李那。	連詩雅（右）密實上陣宣傳電影。

其後兩人轉場到尖沙咀，與連詩雅、沈震軒等人宣傳電影，繼續半裸晒肌的Avis抱起換上低胸Tube Dress的Mia，Mia則在Avis胸上寫字，雖然表現親暱，但男方依然冇表情。

文：影視組