杜汶澤激氣 爆DaDa累劇組
杜汶澤與o靚模陳靜（DaDa）合作的三級新片，務求將香港人偽高尚的假面具揭開，同時將香港人愛低俗的DNA連根拔起。杜汶澤本來對與DaDa的床戲充滿期待，但拍罷後卻嬲到想爆粗，不惜大爆DaDa的缺點！
彭浩翔執導、杜汶澤及陳靜主演的三級新片《低俗喜劇》，雖然對白、劇情極盡低俗，但啜核兼好笑，杜汶澤在戲裏戲外均令人捧腹大笑，他說：「彭浩翔同我講話我同DaDa有床戲，冇死啦，DaDa喺《喜愛夜蒲》幾勁先得o架！點知原來我同佢係喺病床做戲，真係想爆粗。我仲發現DaDa又靚又飛釘，點知原來係唔識揸筷子，係咁NG，呢套戲拍咗12日，如果DaDa識揸筷子，8日就收得工啦！」
飛釘好自然
DaDa聞言即撒嬌又笠高帽，她說：「咁我係用開叉多嘛，所以筷子揸極都唔啱，要喺現場即學，唔緊要啦，有心唔怕遲。拍呢套戲好開心見到偶像，我見到阿澤，心情緊張至NG，第一日開工就拍車震，我唔尷尬呀，呢個係有得發揮嘅角色，我有晒心理準備。（早有預備凸點飛釘？）場戲講喺屋企，都好自然呀！」
投資七百萬
鬼才導演彭浩翔則說：「套戲拍咗12日完成，算係我嘅紀錄，我只係想拍番當年嗰種爆笑港產片，好幸運電檢一刀未剪上三級。（題材敏感入唔到內地市場？）唔代表係損失，套戲拍咗七百幾萬，會收得番成本，內地市場投資方主導，要拍純港片好難！唔可以話係犧牲內地市場，可以百分百呈現自己的創作，唔使被閹割，值得！」
杜汶澤
化妝：諺瞳小白 @ picturesque gate
髮型：James Lee @ HAiR
服裝：double park
陳靜
化妝、髮型：Kayte Fung
服裝：2%
文：影視組
攝：吳文聰