杏兒灑淚避談黃宗澤偷食

胡杏兒與黃宗澤(Bosco)的8年「姊弟戀」正式畫上句號,兩人昨日承認分手,有傳Bosco連環嗒女斷送感情。面容憔悴的杏兒強顏歡笑宣傳新劇,回應分訊時喊足全程,未有斷然否定Bosco「偷食」:「我只可以話我冇第三者!」據悉今次連黃媽媽也出面為兒子箍煲。

杏兒與Bosco於2004年因拍攝劇集《我的野蠻奶奶》撻着,二人感情細水長流。去年尾,杏兒奪視后獎項時將戀情浮面,在台上對男友發布愛的宣言:「希望我哋一路頂得住大家!」正當外間以為兩人感情昇華到談婚論嫁階段,沒料到8年情突然告終,昨日杏兒宣布分手,有傳近期到內地拍劇的Bosco連環嗒女。

多年來杏兒向來與黃媽媽「婆媳關係」深厚,杏兒直認分手後也是第一時間通知她老人家。據悉,黃媽媽也主動為兒子說盡好話,惜最終也未盡如人願。

數月前已分手

公布分訊後,昨午杏兒出席《怒火街頭2》宣傳活動,到場即被傳媒包圍訪問,面容憔悴的她說:「我哋兩個都係藝人,一齊咗咁耐都要同大家交代吓,我哋係冷靜咗一段時間,係分開咗,已經係幾個月前嘅事。」有指Bosco曾經努力挽救感情,杏兒聞後連番嘆氣說:「兩個人一齊,好難講得太清楚,公開咁講對大家都唔公平。」

情緒一度失控

初時杏兒仍能壓制情緒,但講到Bosco指時間能證明一切及待她回心轉意時,杏兒即時情緒失控,淚如雨下:「唔好講到咁,Sorry!我唔想咁樣,大家都係成年人,好想平靜咁處理,唔想搞到好似咁大件事,今日係《怒火》宣傳,好對唔住大家。」隨後杏兒轉身拭淚,情緒稍為平復後,續說:「唔想交代得咁清楚,希望大家畀啲空間我哋,我哋拍拖已經冇乜空間。」

對於Bosco被指連環嗒女,一手摧毀8年情,她說:「我同佢分開咗,唔可以代表佢講嘢,我只係可以講,我冇第三者。」杏兒只強調自己沒有出軌,令傳聞更加似層層。講到Bosco聲言會將事情攬上身,就算死也不會讓杏兒受傷,杏兒再次激動落淚說:「希望大家唔好咁多揣測,一路都諗緊好多方法去交代件事。」她表示未有搬離「愛巢」,因過往沒有「同居」,各有各屋企,兩人關係也並非決裂,可以說是和平分手。杏兒宣傳完《怒火》後先回家休息,到晚上七時到西環會合馬國明為劇集拍攝外景。

「性格太難頂」

至於Bosco昨早接受查小欣訪問時,聲言已盡了力箍煲,他說:「我係想喺埋一齊,但唔得就係唔得,冇話邊個提出,大家係好成熟去商量。」他又感分手一刻晴天霹靂,問二人出問題是否去年杏兒奪視后期間?Bosco說:「可能係我性格太難頂,遇到壓力唔會同人講,冇好好溝通,連阿媽都唔講,男人冇嘢係承受唔起嘅。」

對於被指在大陸連環嗒女,Bosco強調會擔起一切保護杏兒:「絕對唔係,我同柳岩只係拍過兩場戲,係我哋兩個人嘅事,唔關第三者,寫我唔緊要,慣咗被抹黑,男人食得起。」他強調與杏兒再見亦是朋友,將來有沒有機會復合要看緣分,不能強求。

文:影視組

第一手消息請下載on.cc東方互動iPhone/iPad/Android Apps