志偉寸得喜 壽包泯恩怨

無綫與亞視兩台的高層昨日各自率領龐大藝員隊伍，以大贏家姿態舉行聯合記者會，眾人表現風騷，藝員紛紛上台打氣，高喊「2012倫敦奧運會，一齊奧運」口號，會上更宣布奧運開幕當日，亞視藝員會入無綫電視城演出特備節目，瀰漫一片和諧友好氣氛，將兩台之前就收視計法的恩怨拋到九霄雲外。向來多口的志偉忍不住說：「我哋唔會掟壽包！」揶揄亞視早前在北京搞台慶，被指向無人觀眾席掟壽包一事，難得亞視人陳啟泰毫不介意說：「我哋係掟壽桃包，係開心嘢嚟，到時帶啲上嚟節目。」

兩台接力播10小時

兩台的行政人員亦忽然「相親相愛」，首先上台致辭的無綫助理總經理區偉林更搞爛Gag說：「其實應該畀亞視上嚟講先，一來係禮貌，二來呢個會場叫大埔廳，亞視個台喺大埔，所以呢個係佢哋主場，真係對唔住。今次兩台合作體現奧運精神，係三贏，多謝有線同亞視。亞視55年歷史，無綫45年經驗，加埋成100年，轉播奧運一定成功！」

志偉和梁政珏開心合照。

放大圖片

亞視高級副總裁鄺凱迎則說：「明珠台同國際台會聯合組成奧運頻道，每日接力播出10小時奧運節目。」無綫主持朱凱婷將奉召往英國採訪，她說：「星期三中午先收通知，話星期六出發，大概去三星期，我會聯絡香港同內地運動員睇吓做唔做到訪問，會爭取入會場，但未知得唔得，盡做！」

子珊思琦恨去採訪

徐子珊則恨去倫敦：「未知使唔使去，但我心態準備好，會做定功課。（驚被網友鬧？）我又唔係專業，盡力而為！」已為人母的楊思琦亦恨到出口說：「我採訪過2008北京奧運，有經驗o架，但未收到通知使唔使去。（囡囡呢？）媽咪同工人都可以幫手湊。」

文：影視組