許穎「裸」嚟衰 犯禁停售
書展昨天首日開鑼，眾寫真模「胸」群而出踩場！話題寫真模黃榕和許穎（Phoebe）繼續出位，黃榕以谷胸打扮硬闖書展派海報，遭投訴阻路；Phoebe聲稱踩界寫真不會送檢照擺書展，惟仍難逃「被抽書」停售命運，(火羅)到不得了！
今年不少o靚模寫真被轟尺度過火兼意淫，教壞細路，昨日是書展開幕首日，大批寫真模各師各法，殺入灣仔會展谷書。寫真「鹽花」最勁的黃榕和Phoebe惹來廣泛爭議，昨日見Phoebe的寫真仍不乏超激全裸照，僅以雙手遮胸及下體，相當踩界。雖然Phoebe曾誇口稱寫真深具藝術感，揚言不會送檢照放書展售賣，但昨日傍晚其寫真集突然被抽起停售，在場工作人員稱：「今（昨）朝有得買，但最後抽起咗！（點解抽書？）唔知。」Phoebe經理人則回應：「唔係畀人禁（售），係賣晒！」
以笑遮醜死撐好賣
昨晚九時半，Phoebe以低胸連身裙戴黑超殺入會展巡視，亦獲不少宅男邀合照。對於臨時被抽書，她死撐說：「一開始實在太多人買，所以造成混亂，影響咗其他攤位。經貿發局多番勸喻，所以收起啲書，唔好意思！」至於是否因尺度問題而被抽書，她說：「唔關事！（幾時拎番出嚟賣？）暫時未知。（書展過後冇人買？）唔擔心。」再追問寫真是否尺度問題而被抽起？她繼續以笑遮醜，並說：「只係我本書太受歡迎啫！」
至於同樣搏到盡的黃榕昨日身穿粉紅色波點露黑Bra打扮，與o靚模王璐瑤（LuLu）孖住殺入書展，兩女到場派海報，吸引近30名龍友粉絲圍觀合照，有男粉絲疑似輕觸黃榕臀部，期間有逛書展市民投訴黃榕釀混亂：「邊個嚟o架？阻住條路！」問到踩入書展目的？黃榕說：「主要係嚟送貨（寫真），啲書入得書展，但要貼『18禁』警告字眼，幾時上架真係未知，要等貿發局睇過先知。（呢幾日再宣傳？）喺場外派海報，預咗1000張海報，（再入書展？）喬裝啦，因為頭先畀人投訴。」她又表示封面全裸照已經裁走半個屁股。
Mia偷雞簽名急閃
此外，模媽陳靜儀（Mia）、澳洲新八模昨亦有現身書展為寫真造勢。Mia寫真加印了1萬本「潔淨版」，她強調「潔淨版」適合任何人士觀看，至於會否給兒女看？她說：「未有時間畀佢哋睇。」她又稱日前與師妹打小人純粹開玩笑，21日則會舉行簽名會，將以Cosplay造型示人。
Mia完成活動後，便到書展兜圈兼派籌，為稍後的簽名會谷人氣，Mia「見仔就派」，對不少宅男邀她合照攞簽名亦有求必應，不過其實書展禁模簽名，她只好偷雞簽幾個名便急閃離場。
被爆與余文樂傳短情慾短訊而為人所熟悉的LuLu，昨午以性感打扮現身，她指自己衣着很守規矩，並反斥其他不守規矩的模要硬闖書展乃無賴行為。問到會否送寫真給余文樂，她說：「好多支持我嘅朋友會自己買，（叫佢買？）係呀！」
銷量走勢（部分）
冬甩《Donut戀戀東京》
★銷量：6000本
謝芷蕙《MY FIRST TIME》
★銷量：5000本
王璐瑤
《王璐瑤LuLuWong：遺失了的私照...》
★銷量：3288本
張崇德、劉美娟
《讓孩子學會輸得起》
★銷量：逾100本
文：專案組