基仔氹唔掂「姨甥女」
古巨基昨日以設計總監身份出席時裝品牌活動，緋聞女友Lorraine的姨甥女Catelyn充當童裝的「小o靚模」，沒料Catelyn臨場扭計玩倒米，令基仔這個「未來姨丈」冇晒符。
熱愛設計的基仔為時裝品牌設計潮Tee，昨日基仔聯同師妹湯怡出席Giordano《O！COOL！》別注潮Tee記者會，並找來小o靚模Catelyn一同示範潮Tee，但基仔叫Catelyn玩遊戲扮企鵝行又氹她一齊跪地，Catelyn統統擰頭唔肯做，基仔用雪糕氹她合唱《爆了》一樣被拒，到影合照時，Catelyn玩搗蛋險些將儀式櫃推倒，令有名叫「古Sir」的基仔都冇符。
未有動氣
對於小o靚模扭計不合作，基仔未有動氣說：「識咗佢6年啦，係得力助手（指Lorraine）嘅姨甥女，佢頭先喺車度食朱古力又同我唱《爆了》，可能佢第一次面對咁多人同鏡頭好驚。（咁你咪係佢「未來姨丈」？）我係識咗六年嘅朋友。」剛好Catelyn走到基仔身旁，大家即叫Catelyn嗌基仔做姨丈，雖然Catelyn未有照做，但基仔都顯得尷尬而笑。講到應該Lorraine出手才聽話？基仔笑言：「姨媽都未必搞得掂。」
關心劉翔
另外，提到好友「欄王」劉翔日前退出賽事，令人擔心他能否如期出戰倫敦奧運？基仔坦言：「有睇報道，亦有私信問候佢，關心佢咩事，佢叫我唔使擔心，會去倫敦。」至於有傳無綫找基仔做「秘密武器」派他採訪奧運？基仔謂：「無綫真係冇接觸過英皇，亦係我新碟宣傳期，但如果為翔翔我都願意放低自己嘅工作撐佢。」
文：音樂組