關心妍 10分鐘失iPad 恐洩密嚇餐飽
關心妍（Jade）前晚在番禺為「2012香港小姐競選」表演後，乘坐保母車返港，期間發現放在前座的iPad不翼而飛，激到紮紮跳的她立即上微博吐苦水：「很生氣，十分鐘，只需十分鐘！整部iPad就不翼而飛！上個月創作的新歌全不見了！不是金錢的問題，有很多回憶都在裏面！沒有back up裏面的資料呀！」
內有素顏照及新歌
前晚本報記者致電Jade，她沒心機說：「啱啱做完騷上車就搵唔到，依家個人好失落。」問iPad內有冇性感相及親熱相？她嘆氣說：「真係唔記得影咗啲乜嘢，親密照相信冇，但有好多自己素顏樣，不過最緊要係啲新歌。」由於她的iPad可直接上微博、email、facebook，她擔心被人盜用戶口，要急急更改密碼。
前晚Jade返港後本想報警，但最後iPad竟「離奇」出現，她昨午再接受本報訪問說：「昨晚（即前晚）返到屋企樓下老公接我，佢問司機點睇住架車？結果司機喺後座車底搵番部iPad，但我明明成個袋擺喺前座，冇理由只係跣咗部iPad喺後座車底！今次係一個教訓，以後所有嘢都要跟身。」Jade決定不報警，得饒人處且饒人：「我冇證據邊個做，可能偷咗iPad個人好需要呢啲錢，我會為佢祈禱，希望佢唔好再做小偷。」
文：音樂組