薛凱琪賣性感 Eason嫌唔夠

薛凱琪(Fiona)一連兩晚的處女紅館騷於前晚正式落幕,風騷的Fiona獲陳奕迅(Eason)做尾場壓軸嘉賓,令Fiona驚訝得跌坐台上。鬼馬的Eason打量Fiona一身性感的舞衣時,更驚嚇彈開,台上Eason更大爆方大同只愛音樂、不愛美人的秘密。

Fiona一開場即以十五分鐘的勁歌熱舞打頭陣,除騷長腿和性感舞姿,更不時俯身微露事業線吸引觀眾眼球。台上Fiona風騷大唱情歌冧粉絲,唱至情深處,更不禁落淚哽咽。過氣緋聞男友房祖名即上台遞紙巾拭淚,更不介意親手接過「雲吞」放入自己褲袋。細心的祖名只獲Fiona一個握手,反觀台上Fiona特別優待方大同,除出場兩次,更獲伊人多番擁抱。

大同被揭秘密

演唱會尾聲,祖名笑言:「好消息!今日嘉賓點可以得我哋兩個咁少?所以今次我哋搵到成龍!」見Fiona一臉愕然,祖名即大叫:「唔係,係陳奕迅先啱!」Fiona一見Eason從後台步出,更驚訝跌坐台上。Fiona高興得兩次擁抱Eason,豈料即被Eason上下打量性感舞衣,搞笑的Eason更驚嚇彈開:「吓,乜原來裏面有條褲㗎?你知㗎啦,我哋呢啲結咗婚嘅人係咁㗎啦!」未幾,Eason大爆方大同秘密:「佢淨係會對音樂、結他鋼琴興奮,對其他都冇興趣㗎啦。」二人最後合唱一首《陀飛輪》為演唱會畫上完美句號。

最想大食一餐

完騷後移師慶功宴,緋聞男友方大同全程陪實,更坐在Fiona母親身旁。問到Fiona是否當方大同一家人?Fiona笑言:「我信教嘅,全部人都係一家人!(佢哋盡晒做緋聞男友責任?)絕對唔會用呢個字眼,我開騷前已經唔理人哋點諗,一係唔請,一係就兩個都要請。(以為成龍?)有一秒真係以為係,好開心Eason嚟,因為我知佢去盧凱彤個騷。」Fiona笑言完騷後最想大食一餐,盼有機會開演唱會part2。

文:音樂組