許穎寸黃榕：讀多兩年書
寫真展即將開鑼，黃榕以「裸」景出擊兼「走陰」作賣點，今次同樣sell裸露的許穎（Phoebe）前晚拋胸出席活動時，寸爆黃榕野外全裸犯法，又不留情面叫對方讀多兩年書。
前晚o靚模許穎與師妹郭婉霞（Yuna）及夏然然（Cassie）三人「胸」降旺角夜店，拋乒乓球及打桌球時露出豐滿上圍，穿上迷你裙的Phoebe玩遊戲時更走光露底。
自認目中無人
談到近日黃榕在公眾地方影全裸相可能觸犯法例，Phoebe即嘴藐藐寸爆說：「我未睇過呀，不過我知道喺香港公眾地方影全裸相係犯法嘅，我自己都喺私人地方影，自由度大好多添，我仲有幾張係自拍添。」
提到黃榕以美感角度希望脫罪，Phoebe明寸對方說：「我係香港演藝學院文學士，對審美有一定嘅眼光，我覺得有人應該讀多兩年書先。（叫黃榕去進修？）唔知呀，有人囉！（你係咪目中無人？）我心目中都睇唔到其他人！」問到會否支持其他o靚模的寫真集？她坦言：「我一定唔會嘥錢去買囉，就算人哋送畀我，我都要考慮一下睇唔睇！」
石詠莉服o靚模
出道走性感路線的石詠莉，昨日出席將軍澳慈善活動時，透露今年書展亦會推出有關時裝、修身以及化妝的新書。問到黃榕全裸相時，石詠莉公然力撐她：「依家年輕一代性感尺度真係同我哋嗰陣好唔同，我自己覺得依家有啲 over咗，有啲似日本AV feel，但我覺得黃榕意識上已經好啲啲，如果要我影全裸相我真係影唔得，所以我好佩服人哋有呢份勇氣。」