阿Sa中招走音內疚標淚

無綫全台歌手前晚傾巢演出《2012翡翠歌星紅白鬥》，其中阿Sa與台灣藝人炎亞綸演出名為「超班偶像Ｘ超班Fans」環節，被安排到戶外停車場演唱《下一站天后》，疑因場地空曠，音響與錄影廠有出入，加上阿Sa要分心與熱情fans握手，結果走音，她事後說：「係咪真係好差呀？頭先我問助手，佢哋仲話OK，各花入各眼啦！我一直有上堂，一星期五堂，我有努力o架！」此時，阿Sa情急得眼紅紅，更一度以手機遮面，不想喊樣被攝，記者勸她不要哭，她說：「冇，我會再努力。」

陳偉霆力撐女友

陳偉霆昨日出席活動時，開腔力撐女友阿Sa說：「我返去睇番，見阿Sa唱歌之餘仲要落台同fans握手，我唔係幫佢解釋，但佢一向好努力，大家唔好太苛刻，唔係我偏幫，佢唱歌有進步係有目共睹，佢一路有學唱歌。」同門的泳兒亦說：「正常人都有失準時，我都試過失準，唔可以抹殺佢嘅努力，女歌手好多時唔只唱歌，仲要顧高踭鞋，又怕走光！」

阿Sa說到委屈處雙眼通紅眼濕濕，更欲以手機遮面免喊樣曝光。

陳偉霆公開力撐女友因要下台跟粉絲握手而致失準。

梁漢文嚇到甩嘴

網友對《紅白鬥》有讚有彈，有歌手則指綵排與正式演出是兩回事，令人無所適從，連資深歌手甄妮唱《愛定你一個》時，亦因未知歌曲已被cut成短版，被跣到應！慶幸她醒目執生；張智霖與梁漢文被安排站在吊機上演唱則雙雙甩嘴，只好喪笑遮醜，梁漢文事後在微博留言：「綵排好地地，慢慢升向前，live時突然比綵排快咗好多好多，最恐怖係我哋兩個都無安全帶」，字裏行間似仍驚魂未定。文：影視組

梁漢文（右）在吊機上與張智霖獻唱。

甄妮與關淑怡後台合照，惺惺相惜。