姬蒂抱女「糕」慶

最近失婚的荷里活巨星湯告魯斯(Tom Cruise)前日50歲生日,他前日凌晨已由冰島搭私人飛機飛返加州,而上周入紙離婚的靚湯嫂姬蒂賀姆絲(Katie Holmes)就在老公生日當日拖女兒蘇莉(Suri)出街食雪糕。

今年的牛一相信令靚佬湯非常難忘,於 生日五日前突然被老婆狠飛,最終未能與老婆同囡囡一同慶祝。據知靚佬湯今年想搞一個驚喜生日派對,亦曾懇求姬蒂去冰島陪伴他慶生,而他更藉見面希望最後一次修補關係,因為他有信心氹掂姬蒂放棄離婚,但最終卻被姬蒂拒絕,二人更因而吵大鑊。一直被姬蒂蒙在鼓裏的靚佬湯幾星期前受訪時亦透露過生日慶祝大計,他大讚冰島風景如畫之餘,更透露他與姬蒂喜歡行山,於生日時去行山或會去露營慶祝。

雖然靚佬湯被傳已返回加州準備慶生,但姬蒂就懶理老公生日,前晚就被影到與囡囡半夜三更去食雪糕之後返家,可憐的蘇莉因年紀太細的關係而自顧歎雪糕而不知父母離婚!

養子開腔撐老竇

至於靚佬湯的養子康納(Connor)日前就在twitter留言話:「朋友來去匆匆,但家庭才是永恒!」似是全力撐老竇。而姬蒂昨日早上就正式開通新浪微博並上載早前在中國遊故宮的照片。

另方面,靚佬湯被指與科學教教主David Miscavige的關係密切,二人會着情侶裝似足夫婦。適逢前日是靚佬湯50歲生日,電影公司為慶祝他牛一正式在戲院公開其新片《Jack Reacher》的首個預告片,在片中靚佬湯駕跑車、(目及)女之餘更一打五施展好身手!

文:外娛組