Mandy Lieu自製機會 搞異地戀
名模Mandy Lieu自爆投資六位數，親自製作一個旅遊節目，榮升製作人的她並已跟電視台傾好播放權，還雄心壯志地表示將會一直做下去；而曾與台灣型男陳柏霖拍拖的她更不抗拒再搞異地戀，看來Mandy大有機會成為事業愛情兩得意的新女性！
Mandy Lieu和第五代Canon女Madi Ross昨日齊為珠寶騷擔任示範模特兒，Mandy透露最近去了馬來西亞拍攝旅遊節目，由於對這方面很有興趣，所以現正忙於親自製作一個旅遊節目：「其實一直有呢個諗法，會做production（製作）搞節目，9月會去意大利拍，節目形式主要係介紹不同地方嘅特色同推介特別嘢。」並表示已將播放權賣了給電視台，但就不肯透露是哪一家電視台，她說：「投資唔會太大，有當地支持，一個節目完咗，之後都會繼續拍。」又透露亦有東南亞國家的電視台找她接洽，節目未來會在香港播。問她為何突然轉變角色由模特兒變成製作人？她笑言：「朋友都問我，做咗主持咁耐，不如自己試吓做，（投資咗幾多資金？）六位數一定有。」
企戙戙等人追
她還透露將會去兩趟意大利拍攝：「第一轉會留喺當地3星期，有10集喎。而同now台拍嘅旅遊節目唔同類型，大家會繼續合作。」Mandy的目標是透過節目環遊世界，因自覺有很多地方都未踏足過：「未去過南美洲，南北極都未去。始終自己鍾意呢樣嘢先會做。」至於會否順道發展異地情？她就笑言：「哈哈，會加油，（來來去去得陳柏霖一段台灣情緣？）太專注拍嘢啦，太多嘢做。（成日飛，咪好難有人追？）所以咪企喺度囉！冇辦法，隨緣啦！」
文：名人組