祖兒爆Eason 八卦套戀情

樂壇天后容祖兒聯同Eason、林峯、謝安琪和王梓軒昨日一同現身紅館，為音樂匯演任表演嘉賓。老友鬼鬼的祖兒和Eason自「龍兒戀」曝光後首度碰頭，Eason透露有看「龍兒戀」報道，但自言作為外人不應講太多，又稱跟劉浩龍、祖兒和何韻詩三人分屬好友，如有需要可隨時致電找他傾訴。

開場白次次一樣

最搞笑是另一邊廂的祖兒甫見記者便大爆Eason近日經常致電給她，又指Eason每次找她都以「最近你首歌幾好聽，有無時間傾兩句？」作為開場白，祖兒笑說：「佢成日打電話嚟『呃水吹』，我知道佢有嘢想八卦，但自己嘅事我自己會處理。」

問祖兒會否仍視阿詩為傾訴對象？她說：「一直都係，以後都係。」雖然日前阿詩稱自己會孤獨終老，不過祖兒就不相信她：「佢講你又信，佢好鬼馬。」同時又再次表明：「我哋都成熟，唔需要將友情同感情放上嚟講咁幼稚。」並預告：「始終有一日我哋會同台出現，大家就知咩事。」

林峯（左起）、謝安琪、Eason等齊任表演嘉賓。

何韻詩與劉浩龍近期成為新聞人物。（資料圖片）

難管男友被惡搞

對於劉浩龍近日成為網民惡搞對象，祖兒感嘆地說：「每日都有唔同嘅故事，實在答唔到咁多啦。」同時Eason亦力撐劉浩龍為人：「我哋成班朋友識十幾年，要抽水都抽咗我哋先啦。」

文：音樂組