任達華哭波喪 擺食意粉
於圈中擁有大批球迷的英格蘭，昨凌晨於歐國盃八強戰中不敵意大利出局，令眾藝人非常失望，頭號粉絲任達華直言要罷食意大利粉，而「浸大E神」楊梓瑤（Carol）則怒插隊中王牌射手朗尼獨食成輸波罪人。
今屆歐洲國家盃成為城中熱話，昨凌晨上演英格蘭與意大利的八強大戰，吸引不少圈中球迷捱夜捧場，最後經過一輪激鬥，英格蘭最終射輸十二碼出局，令圈中不少英格蘭躉大為失望，紛紛哭波喪，其中任達華於微博直言看着愛隊出局「哭了」，他寫上︰「英格蘭，出局，多喝水補充體力應付明天的工作。」昨日他接受訪問時笑言要罷食意大利粉一個月，他說︰「我喊咗一場，呢個月唔食意大利粉同Pizza，其實英格蘭已踢得好好，但意大利真係太強，冇辦法啦。」不過屬英軍頭號粉絲的他直言會繼續力撐愛隊，並透露將舉家到英國觀看奧運。
水準難接受
而另一英軍忠實球迷「浸大E神」楊梓瑤昨凌晨亦有坐在電視前支持愛隊，但輸波後則非常失望，昨日她於電話中更插隊中球星朗尼冇料到兼獨食，她說︰「英格蘭被人撳住嚟打，水準太難接受，朗尼踢得好差超獨食，如果唔係個龍門表現好，一早就已經輸咗。」
寸爆英領隊
至於譚詠麟更於微博寸爆英軍領隊鶴臣，他說︰「英格蘭也就只能這樣了，鶴臣可能要去做學神。」皮草大王太子爺王大業亦在微博說︰「英格蘭又一次令我失望。」
文︰專案組