陳華鑫失信心 怕殘酷3叮

【陳永峯倫敦直擊】今屆港姐大玩噱頭以極殘忍手法安排佳麗投票互叮,身在倫敦無奈被foul的鍾麗及陳華鑫,對此黑面狠批無綫不負責任,諗頭多多的統籌經理余詠珊則打算舉行「復活戰」,讓落選者玩多鋪,繼續玩殘參選佳麗,但被「叮完又叮」的陳華鑫卻似乎無信心再戰!不過今屆「咪神」曾明俐則分數最高可直入決賽,可謂有人歡喜有人愁。

今屆香港小姐改玩殘忍真人騷,經過連番淘汰賽後,16位身在倫敦拍外景的佳麗繼續被魚肉,前日分組賽落敗一方再foul兩人,但竟非由評判決定,而是臨時宣布由負方8人互選「最應被foul者」,最終外形不俗的「短打桂綸鎂」陳華鑫及「浴照佳麗」鍾麗被叮出局,兩人均面燶燶表示不滿,前日更被安排繼續跟隊到大笨鐘進行拍攝,非常殘忍!

曾明俐直入決賽

另一邊廂,大會宣布Top 3佳麗是曾明俐、張名雅及湯洛雯,分數最高的曾明俐更有「免foul金牌」直入決賽,她認為優勝處是有做Gym操弗,問她是否與上圍最豐滿有關?她說:「都OK,但大家都好靚。(慶祝?)唔會住,都唔可以話冇晒壓力。」

港姐今屆為有Noise無所不用其極,大會統籌經理余詠珊表示或會在決賽前舉行復活戰,讓已Out佳麗再有機會「翻叮」,她說:「我哋一直留意群眾反應,如果真係Out咗最靚嘅,都唔使擔心,可能畀出局佳麗比賽多一次。」對於佳麗投訴互選不公平,余詠珊說:「我哋諗嘢一定叻過佢哋,就算玩多次可能最終會勝出,但都有機會畀大家睇係咪實至名歸。」

應該每隊叮一個

大會副籌統經理陳家揚亦不認同規則殘忍,表示會安排工作予出局佳麗,而且兩人會跟大隊拍攝「散心」,至今日才返港。問到會否怕叮走較漂亮佳麗?他說:「唔會嘅,質素咁平均,其實我哋都好難揀。」似暗示評判揀唔掂才交由佳麗互片,難怪被foul的鍾麗大表不滿:「覺得幾唔公平,當時兩隊打和,心諗應該每隊foul一個,突然叫我哋揀,都唔識揀!(唔負責任?)梗係啦!佢哋揀唔到,我哋仲難啦!」

有經驗增添信心

陳華鑫心情則較輕鬆,身為後補佳麗的她再次被foul,問到會否覺得被玩?她說:「咁諗仲唔開心!但我都係求其揀,點指兵兵囉!可能我唔夠高又唔夠靚。」對於或有復活戰,鍾麗大表贊成:「有被Out嘅經驗,復活戰好有信心,我會更加努力!」相反陳華鑫似信心欠奉,怕再被Out多次,陳百祥(叻哥)則認為有「汰弱留強」效果。

此外,負方一組隊長卞曉帆最後與陳華鑫爭出線,笑晒口的她否認胸有成竹:「我係隊長,有叫大家要笑,唔好喊。(殘忍?)都幾!要寫一啲唔想寫嘅人落去。」

知己知彼翻叮必勝

港姐真人騷由香港力戰到倫敦,無綫密謀「復活戰」將被踢出局的佳麗循環再選,最近兩輪被「叮」的六位佳麗必須爭取機會重生。

第一手消息請下載on.cc東方互動iPhone/iPad/Android Apps