陳展鵬肯定自我價值

陳展鵬重返無綫後一劇接一劇演出，並已踏上一線位置，擔演男主角，現正播映的劇集《衝呀！瘦薪兵團》中，他演一個既Hea又不「麻甩 」的後生仔，與田蕊妮飾演一對，可說是真真正正第一次擔演輕鬆喜劇，展鵬不諱言與阿田、阮兆祥等合作愉快，他說：「平時我好少同啲拍檔傾偈，好收埋自己，因初初返嚟嗰陣，好冇信心，好多嘢未識仲要學，今次係佢哋幫我開竅，演出時氣氛好好、好互動，讓我可以釋放出來。」

說到現時受到不少稱讚，之前導演葉念琛更於專欄中點名稱讚他演技好，於無綫小生中甚出眾，展鵬謂：「其實我從來未同葉念琛合作過，好多謝佢提點！」

現階段最開心

獲監製、高層賞識的展鵬坦言現時是他自訓練班以來最開心的日子，他指無綫的確是一個很適合他工作的地方，他謂：「呢度好多人睇住我成長，好有歸屬感，終於覺得自己有價值，呢十幾年唔係白做嘅。舊年所有嘅嘢自己都好沉重咁應戰，拍《真相》、《叛逃》（前名《ATF反恐》）時真係好大壓力，好似打爛個錢罌攞啲錢出嚟咁，（用晒未？）未，做咗十幾年，經驗都仲有好多。」

提到劇中經常與比自己大年紀的女演員做一對，之前與張可頤，現時又與田蕊妮，展鵬坦言最緊要自己投入角色。說到現實生活會否介意另一半比自己年長時，他謂：「唔知呀！其實我未試過，不過我比較着重思維上，大家一定要溝通到，尤其做呢行，如果另一半唔成熟真係好難諒解。」

文：影視組

攝影：秦健輝

服裝：Harvey Nichols