田蕊妮猶幸人生有低潮
人生要經歷低潮才學會珍惜，此話不無道理，數年前，田蕊妮與老公杜汶澤財源滾滾，一切得來得太易，二人不自覺迷失自我；但風水輪流轉，曾經面對一沉百踩，滋味並不好受，幸而有宗教協助令二人「重生」，難怪阿田謂：「如果冇嗰幾年，我諗我哋黐咗！」
近年田蕊妮與杜汶澤變得慈祥，與朋友聚在一起的話題離不開佛學，完全不像有過一段意氣風發、目中無人的時期，其實一切來自阿澤突然於事業高峰期塌下的經歷，令二人更加認清自己所需，並於宗教帶領下再次活過來。
於亞視出身的阿田，從未想過於街道上被人認出，再加上另一半上位快，不知不覺令二人迷失自我，她謂：「我哋可以無喇喇去轉倫敦使一大筆錢；架車揸幾個月，唔鍾意又換咗佢，仲試過同一時間有４部車！雖然係好有錢又買好多嘢，但實際又唔覺自己得到啲咩，所以嗰幾年其實生活得最唔開心。」
曾想過離婚
愛夫情切的她，眼見丈夫如此心雄，就連身為枕邊人的她，所說的話也統統聽不入耳，令阿田一度想過離開，沒想到沒多久，阿澤事業從高峰滑下，阿田不捨於此時期拋棄至愛，最終她拜神及會見寧波車，希望令阿澤順利渡過難關，沒想到過程令阿田有所得着，她謂：「宗教令我心靈上、修行同智慧增長，所以咪繼續學習囉！老公都一樣，嗰幾年係我哋好好嘅成長階段，如果冇嗰段日子，我諗我哋黐咗！」
患難見真情
早前阿澤抱恙，令阿田把一切看得更透徹：「佢個病嚟得太突然，開頭唔知咩事真係好驚，我又唔喺佢身邊，真係體會到人生無常！不過好多謝一班朋友咁關心佢，反而我自己就大意，唔知身上有病菌，結果傳染咗畀老公，令佢辛苦加辛苦。」
採訪：影視組
攝影：沈健程
服裝：Zadig & Voltaire
化妝：小白
髮型：Mini Cheung@Market Art of Hair