薛家燕呷醋 個女大細超
薛家燕對於大女石祐珊和歌手王梓軒傳出緋聞，坦言「女大女世界」不加意見，對「準緋聞女婿」的印象極佳，笑言望女兒「公私兩忙」時，也要識「輕重之分」，勿再玩失蹤及「大細超」只幫緋聞男友，似乎家燕姐呷醋了。
有「新城鎮台之寶」之稱的薛家燕，將率領一眾DJ推出雜錦碟《Dream Comes True》，望再創80年代面世「6 pair半」大賣的神話。日前家燕跟同台DJ包括：瑪姬、路芙、啤梨、李國能、李紫昕、Ben、Bob及范振鋒等灌錄全新雜錦碟，唱片將於暑期推出，而重點推介的歌手正落於薛家燕身上。
薛家燕接受訪問時哈哈笑，不知是電台的力捧歌手，多謝高層朱明銳看重她。談及大女石祐珊和王梓軒傳出戀情，她說：「我冇問佢喎，大家年輕人做吓朋友冇所謂，況且王梓軒有才華、勤力又孝順係好男仔。（佢家底豐厚？）咁我家底都唔差o架，哈哈。」
讚路芙似葉德嫻
問可覺得女兒有異樣？她說：「有呀，佢成日失蹤，搵唔到佢囉，咁我除咗係佢阿媽外，佢亦都係我經理人都要幫我做嘢。（個女大細超？）有少少，所以我都提醒佢要識分輕重，依家我覺得自己係輕囉。」她直言已叮囑女兒幫王梓軒之餘，也勿忽略媽媽。
電台高層朱明銳表示有出碟構思，全因圓DJ做歌手的夢，除點名大讚薛家燕外，亦指靚女DJ瑪姬潛質優厚，至於最令他感驚喜是精於主持靈異節目的路芙，他說：「我試聽路芙新歌，有人問係咪葉德嫻唱新歌呀，佢把聲真係幾似葉德嫻嘅。」
文：音樂組