湯洛雯壓力爆釘鬥便便
【陳永峯倫敦直擊】十六名港姐前日到了倫敦塔橋拍外景，當地氣溫低至十三度，港姐穿着薄薄的短袖Tee在戶外企足幾個小時，湯洛雯更凍得疑似「飛釘」，但尷尬之情卻不及卞曉帆被起花名為「便便」，認真𤓓爆。
《2012香港小姐競選》前日到了倫敦進行首日外景拍攝，並繼續進行殘酷淘汰戰。外景嘉賓陳百祥即場挑選了湯洛雯和卞曉帆為隊長，以便她們各分兩組作賽篩人，兩女雖有幸被選為隊長，但不能幸免被Foul以證賽制公平。
身為明星二代的湯洛雯雖被陳百祥（阿叻）揀中，但不覺有星爸（湯鎮宗）而有優勢，拍外景時更凍得疑似失守「飛釘」，相信因此而打擊信心。湯洛雯事後接受訪問稱當選隊長感到壓力，但強調陳百祥並不認識其父，所以不覺是靠後台而被選為隊長：「以我所知阿叻唔識我阿爸，可能係睇報道認得我啫！（怕被針對？）唔會！我哋都相處好好，（優勢？）到我着泳衣出嚟就知我冇優勢！」
林泳淘六點後禁食
至於另一位隊長卞曉帆因姓氏發音特別，被工作人員起花名為「便便」使眾人失笑，問到她可知「便便」是代表「屎」？卞曉帆反問記者是否有其他意思：「我自己唔介意，當我係好朋友先會咁樣叫啫！班女仔都友善，我亦冇唔開心！（被選為隊長會有咩準則？）我會令班女仔Close啲，大家可以傾對策，（同湯洛雯對立？）唔會，之前揀人時大家都好禮讓。」
倫敦氣溫低，林泳淘和李渼琪凍至捽手互相取暖，自稱很怕凍的林泳淘表示稍後要泳裝上陣時會更擔心，必要時惟有頂硬上：「我只好催眠自己啦！（着泳衣準備？）我要再減十磅，依家已經戒食消夜，呢兩日開始六點後唔進食！」另李渼琪因廣東話不太流利，每在拍攝時都要工作人員多番講解，但仍算跟到進度。
文：影視組