盧凱彤掛住開工 拍拖變折磨

唱作歌手盧凱彤經常穿梭各地工作,單身多年的她坦言現時不急着拍拖,因現在工作忙碌,而且常要出埠,如拍拖會變了折磨。她亦無懼被叫剩女,並言家人支持她的每一個決定。

盧凱彤(Ellen)將於下月舉行音樂會,她表示今次的音樂會可算別開生面,因為不會有樂隊,就只有她與一支結他:「今次會比較吃力,因為要不停諗唔同嘅編曲,亦會將一啲大家耳熟能詳嘅歌曲改編,引起共鳴。」Ellen近年的發展愈來愈順利,自她去年推出首張國語碟後,即於台灣不同的頒獎禮上獲不少提名,Ellen直言為此感到高興,因從沒想過會引起如此大回響。

搵老人傾偈

問到單身多年的Ellen經常四圍飛,可曾試過有艷遇?她說:「每次去做嘢都係逗留好短時間,出入最多係酒店同場館,但去到其他城市都會每朝跑步,同啲公公婆婆傾偈,有時都會見到吸引嘅人,但未有興趣。」Ellen坦言現時覺得拍拖麻煩,全因她工作忙:「一嚟自己冇時間,二嚟我可能一星期去兩個城市,如果拍拖嘅話會對另一半唔公平,對我亦係一個折磨。」

事業黃金期

工作多年的她已學懂照顧自己,而強悍的性格亦令她不急於找另一半:「依家啲人成日話剩女,但我唔驚,會當係耳邊風,屋企人亦唔會催,反而會覺得依家係我做音樂嘅黃金時期,只要我覺得有滿足感同開心,佢哋就OK。」

文:音樂組 

攝:沈健程

Make Up:Kris Wong

Hair:Kenki@ Queen's private i

Wardrobe:All initial

Stylist:Tang Lai