娜姐男女攻略 全城Phone傳

依家玩手機Apps已成生活一部分,無論係後生仔女、青年才俊抑或師奶阿嬸,每日唔玩唔安樂,久唔久就有Apps爆紅。數到近期至hit,一定係「歐國波Something」App,自六月一日面世以來,即成全城熱話,型男索女都趕住撲入呢股歐國盃熱潮。究竟呢個App有乜咁巴閉,搞到大家傳頌,唔download唔安樂?與周秀娜有乜關係?即刻話過你知!

就算大家平時唔睇波,但大型賽事點都唔可以錯過,四年一度嘅歐國盃本月八日就殺到埋身,呢項大賽睇星都夠,C朗、費蘭度托利斯、尹佩斯、馬里奧高美斯……個個型、英、帥、靚、正,唔睇點有話題?

李丞責指點迷津

而喺呢個娛樂世界,齋講波無疑寡咗啲,「歐國波Something」就聰明地包羅埋娛樂元素,將各個階層一網打盡,計算得好準確。當中嘅「娛樂台」,除請來本港半百紅星「講情講波」外,又搵到「至索女神」周秀娜瞓身教授「歐國盃男女攻略」,加上「風水足球」請得「人氣玄學家」李丞責師傅為大家指點迷津,啱晒潮男潮女口味。

而「歐國妹Polling」互動遊戲仲夠晒絕,勝出者有機會同「女神」周秀娜及何佩瑜在內一班師妹齊齊睇決賽,連「宅男界」都擸埋,有乜辦法唔受歡迎先?

「歐國波Something」食正呢條水,提供即時新聞同即時戰情,又有星級名家如黃興桂、向柏榮等同你傾波經,內容夠寸夠爆夠啜核,段段嗒落有味。