A. Lin多人追 獨吼黃曉明

新八模出身的A. Lin最近一年在北京電影學院進修,獨自生活的她成熟不少,亦希望可「脫模」改走演員路,而她雖被不少同學力追,但不會因寂寞亂拍拖,暫時亦未搵到像黃曉明般的型男!

新八模出身的A. Lin(裴殷)去年放低香港工作,獨自到北京電影學院進修表演系一年,已適應當地生活的她這日到三里屯附近的酒吧街及小食街閒逛,面對小食即笑晒口,但她笑言不敢亂吃,因地道美食均多油易肥。

耐性大增

這一年的經歷令A. Lin成熟了不少,她表示以前塞車兩小時即會嬲爆,但現在塞車可謂「家常便飯」,令她耐性大增,此行亦認識到來自內地各省份的同學,令她感觸良多:「相處得好開心,大家會互相照顧同煮飯分享。」

A. Lin將於本月畢業,學有所成的她希望可多做演員工作,問到會否繼續留京發展?她笑言除了天氣較乾外已愛上北京,希望繼續在當地工作:「最近到青島拍微電影,七月就第一次拍內地電視劇,好緊張!不過,我都會返香港做嘢,始終父母都在港。(驚香港Fans唔認得你?)唔會啩!我同Fans喺微博成日互動,而且兩個地方好近之嘛!」她直言沒有留意香港o靚模動向,只寄語大家搵對自己的路,不要後悔。

不亂拍拖

離鄉別井自然容易寂寞,問到會否找個「愛情水泡」?A. Lin直言有不少追求者,又大讚北京男士高大威猛,但不會亂拍拖:「都有男仔約我睇戲又帶我周圍去,好多人話北京男仔大男人,但其實都好善良,我唔介意異地戀,只係未有Feel。(未揀定?)暫時未係時候,如果好似黃曉明咁又唔同!哈哈!」

陳偉立北京直擊