四哥：娛樂圈風氣變

我覺得我哋嗰代做藝人係冇出息，中國人思想覺得做藝人好似做大戲，叫戲子佬，好低級，但都好過做歌星，畀人叫歌女，因為冇乜發展，所以我唔希望兩個仔女入娛樂圈，不過年代唔同啦，依家反而好多有錢人想入行。至於話睇好當代邊個演員，娛樂圈我淨係識舊人，唔識新人，依家啲戲我都唔睇嘅，好少睇，對電影界都冇認識。

點石「老金」

至於霆鋒，冇話希唔希望佢更上一層樓，我邊有咁叻呀？唔通我睇好嘅，就真係會紅咩！我咁叻就點自己成金啦，變老金呀哈哈……呢啲嘢邊有早知？點解啲仔女會入行？好多嘢係無心插柳，霆鋒好細個就鍾意唱歌，而婷婷讀得書，我叫佢讀完書睇吓有咩做先，到哥哥入咗行，我話嗱婷婷，謝家好少人大學畢業o架，你一定要爭氣。佢讀到喎，咁我咪好開心囉，佢讀完書唔係話要入行，係我哋回流香港嘛，咁嗰邊（加拿大）真係冇得發展，咪叫佢返嚟做嘢。

嘩，點知婷婷同啲傳媒好似有仇咁，日日都影到佢，佢自己又鍾意玩，好誓不兩立！我就冇理佢囉喎，點知整整吓佢又做咗model，呢樣係佢喜愛，佢鍾意化妝、着靚衫，做做吓又成功，我睇見佢哋入到有興趣行業，又有少少成績，我就由佢。

以前娛樂圈好簡單，嗰時我哋會同啲傳媒一齊食飯，你請我食我請你食，你請我上你屋企，你上我屋企。傳媒真係「無冕皇帝」，好有權威，你估依家部分傳媒？嘩，亂到呢……，唔同o架，變晒質啦，時代變冇法子。

CoCo（女友）都接受唔到依家傳媒嗰種採訪方式，所以有咩地方我都唔帶CoCo出去，佢亦唔鍾意，無謂勉強係咪？總之佢happy就得，佢係低調，但後生女嘛，鍾意出去玩，之前傳媒寫到佢好唔公道，有部分傳媒鍾意作嘢，上次又話我有暗病，我都費事理！（完）

後記：按摩堅拒晒月光

四哥英俊瀟灑、風趣幽默，整個訪問過程逗得小記不停哈哈大笑。話說當年黃霑曾想替他出自傳，但要求跟四哥同居三個月，四哥斷然拒絕，原因是怕霑叔會愛上他！

又例如，四哥慨嘆自己外形花弗，令人誤會他「嫖賭飲蕩吹」樣樣齊，他反問說：「點嫖？我連去正當地方按摩，都着番條底褲o架！我驚畀人鹹濕嘛，驚畀啲衰女見到我個屁股，話『哎呀謝賢原來係咁o架？』」四哥魅力沒法擋，錫身是應該的。

口述：謝賢　

筆錄：名人組