學友唱足一世 Eason佩服跪拜
50歲的歌神張學友前晚完成146場巡唱，締造健力士世界紀錄，永不言休的學友希望唱足一世，吹神陳奕迅（Eason）不但睇足全場給予爆分，還在慶功宴上以歌迷身份跪拜學友，兩神相遇又抱又貼面，笑言要拍部《秋光乍洩》。
十場「張學友1/2世紀演唱會」前晚於亞洲博覽館完美落幕，吸引Eason、蔡一智、導演劉偉強、狄波拉和老公捧場，全場爆滿氣氛high爆，學友演繹了之前145場都冇唱過的金曲《月半彎》，由於是尾場關係，學友和觀眾都依依不捨，唱至11時45分學友頻頻望鐘，仍未夠喉的他笑說：「仲有時間。」觀眾拍爛手掌支持。
度開心難忘50歲
尾聲時學友感觸說：「仲有個幾月，我嘅50歲將會過去，多謝大家過去一年半以嚟一直陪住我，令我過咗一個非常開心難忘50歲，你哋嘅笑容、眼淚、拍手、感動表情畀我好大滿足感，我係非常含蓄嘅男人，但我好想話畀大家聽，其實我好愛大家，唔知下個騷幾時做，亦唔知跳唔跳得郁，希望不久將來再喺舞台見，無論我60、70歲，只要有你哋喺度，我會將自己最好交出嚟。」全場掌聲雷動。
爆笑《秋光乍洩》
完騷後學友出席慶功宴，捧場的Eason以歌迷身份跪拜學友，兩個大男人擁抱貼面，撞埋一齊時幾乎錯位咀嘴，學友笑說：「叫劉導演開部《秋光乍洩》。」全場爆笑；今次學友巡唱不但破了香港歌手紀錄，還締造了12個月內觀眾總數2,048,553人，打入健力士世界紀錄，學友說：「好想一世唱落去，自己冇諗要破乜嘢嘅紀錄。」
而Eason則大讚學友演出完美：「佢保持自己狀態，146場都唔可以病，呢下好勁，值得學習，我畀佢爆晒分，佢係一個好大嘅集體回憶，尤其我呢啲死fans，佢真係神嚟！唱歌冇欺場，所以佢係我偶像。」
採訪：音樂組